Elina Svitolina ka treguar një paraqitje të shkëlqyeshme të tenisit defensiv, duke regjistruar fitoren më të madhe të karrierës. Ajo ka arritur të rikthehet dhe të triumfojë 2:1 në sete (3:6, 6:2 dhe 6:2) ndaj amerikanes Sloane Stephens në finalen e turneut përfundimtar të vitit, WTA Finals të dielën.
Ukrainasja arriti në WTA Finals në Singapor në formë jo të mirë, mirëpo arriti të gjejë formën atëherë kur u desh. Fitoi të gjitha meçet, përfshirë edhe tri meçet në grupe.
“Është një moment shumë i veçantë për mua në karrierën time dhe do të më jap shumë vetëbesim për stinorin e ardhshëm. Jam shumë e lumtur me performancën time”, ka thënë Svitolina, ndërsa mori trofeun nga legjenda Billie Jean King.
Stephens nisi furishëm përballjen dhe i fitoi tri gemet e para të meçit. Ajo e mbylli setin e parë në favor të saj, 6:3, shkruan Reuters, transmeton “Koha Ditore”. Mirëpo, Svitolina arriti të kundërpërgjigjej në dy setet vijuese, ndërsa kthente gati çdo gjuajtje që bënte Stephens. Ajo tregoi një lojë impresive defensive.
“Jam shumë e lumtur që kam qenë në gjendje të mbyll stinorin në mënyrën si e kam mbyllur. Nuk ishte rezultati që kam dashur, por kam punuar fort për të arritur deri këtu. Jam krenare me lojën time dhe jam e lumtur me paraqitjen që kam bërë gjatë javës”, ka thënë Stephens.
Triumfi i Svitolinas ishte i 13-ti në 15 finale në turne gjatë karrierës. Ky triumf do t'i japë motiv asaj që në vitin 2019 më në fund të fitojë edhe një turne Grand Slam. Ukrainasja 24-vjeçare ende nuk ka fituar Grand Slam. Më së shumti ka arritur deri në çerekfinale.
