Shqipëria ka siguruar medalje në Kampionatin Evropian të rinjve në boks që po mbahet në Sofje të Bullgarisë.
Ariol Zeneli të martën në kategorinë deri 51 kilogramë mposhti bindshëm 5:0 boksierin nga Sllovakia, Lukas Vymyslicky, duke siguruar kalimin në gjysmëfinale të Evropianit dhe e ka të garantuar së paku medaljen e bronztë.
Zeneli në 1/8 e finales kishte befasuar kampionin e vitit të kaluar, spanjollin Rafael Lozano Serrano.
Në çerekfinale ndaj sllovakut Vymyslicki, Zeneli, ishte dominues. Në fund triumfoi me 30:27, 30:27, 30:25, 30:26 dhe 30:27 me vlerësim të gjyqtarëve. Zeneli kishte fituar medalje të bronztë në Evropianin e të rinjve vitin e kaluar në Budva. Garoi në kategorinë deri 48 kg.
Të hënën boksierët e Kosovës, Taulant Jakupi dhe Donat Syla po ashtu siguruan medalje. Të dy arritën në gjysmëfinale, Jakupi në kategorinë deri 86 kilogramë e Syla në atë deri 92 kilogramë.
