Mesfushori spanjoll Fabian Ruiz pritet të largohet nga Napoli gjatë afatit kalimtar të janarit, kanë raportuar të enjten mediumet italiane. Mësohet se drejtuesit e Napolit tashmë kanë vendosur ta nxjerrin në shitje Ruizin, i cili ka refuzuar rinovimin e kontratës që i skadon në vitin 2023 edhe për dy vite tjera.
Për ta lënë të lirë Ruizin, skuadra e Napolit po kërkon 50 milionë euro dëmshpërblim. Mesfushori 24-vjeçar, iu bashkua Napolit në vitin 2018 nga Betisi për 30 milionë euro kurse këtë edicion ka një gol e një asistim në 18 ndeshje për ekipin italian në të gjitha garat. Interesim për transferimin e Ruizit thuhet se tashmë kanë shprehur ekipet nga La Liga, Barcelona e Real Madridi.
