Kryetari i klubit të futbollit Prishtina, Remzi Ejupi, tha se nënshkrimet e klubit janë valide dhe se e gjithë mbështetja është për Gramoz Vokrrin.
“Ne kemi ndërruar vetëm delegatin, por jo edhe mbështetjen. Pra, klubi Prishtina ia ka dhënë mbështetjen Gramoz Vokrrit. Edhe sikur Gramozi t’i kishte 20 nënshkrime, sërish do t’i gjenin diçka sepse ai (Agim Ademi, kryetari i FFK-së v.j.) frikësohet edhe nga hija e vet. Ne e kemi ndërruar delegatin për shkak se Artani do të ketë udhëtim zyrtar. Por, edhe e kundërta, ‘çka nëse njëri nga delegatët’, do Zoti jo, do të vdiste, ne nuk duhet të dërgojmë delegat tjetër për votim a? Ne si klub Prishtina ia kemi dhënë mbështetjen Gramozit dhe Fikret Maçastena dhe Rrahman Haradini do të jenë kandidatët e Prishtinës”.
Komisioni për mbarëvajtjen e procesit zgjedhor të Kuvendit të rregullt zgjedhor për kryetar të FFK-së i themeluar sipas vendimit të Komitetit Ekzekutiv të FFK-së më 2 mars, ka refuzuar të mërkurën kandidaturën e Gramoz Vokrrit, ndërsa ka aprovuar atë të kryetarit aktual, Agim Ademit.
Në arsyetimin gjashtë faqësh të Komisionit janë dhënë edhe arsyetimet e aprovimit, përkatësisht refuzimit të kandidatëve për kryetar të FFK-së. Emrat e Komisionit nuk janë bërë të ditur.
Komisioni ka vlerësuar se të pavlefshme janë nënshkrimi mbështetës i Naim Biçkajt, dy nënshkrimet mbështetëse të Rrahman Haradinit, nënshkrimi mbështetës i Artan Osmanit dhe nënshkrimi mbështetës i Bajram Shabanit.