Sulmuesi i Kosovës, Milot Rashica pritet të largohet pas vetëm një sezoni nga Norwich City. Tabloidi “The Sun” ka raportuar se krerët e Norwichit do t’i shesin disa prej lojtarëve pas rënies në Championship, në mesin e të cilëve është edhe Rashica.
Norwichi këtë edicion u rikthye në Premier League, por nuk arriti të mbijetojë duke e konfirmuar rënien katër xhiro para përfundimit të sezonit. Renditet në pozitën e fundit në tabelë me 22 pikë të grumbulluara pas 34 ndeshjeve të zhvilluara, ku ka regjistruar vetëm pesë fitore.
Rashica iu bashkua Norwichit verën e shkuar me bujë të madhe për 11 milionë euro dhe firmosi kontratë deri në vitin 2025. Në 32 paraqitje në të gjitha garat, Rashica ka dy gola e po aq asistime. Për 25-vjeçarin, kjo është hera e dytë rresht që nuk arrin ta shpëtojë ekipin e tij nga rënia. Sezonin e shkuar, ai u largua nga Bundesliga me Werder Bremenin.
