Sigal Prishtina ka fituar bindshëm ndaj Golden Eagle Yllit. Të martën mbrëma në Prishtinë, skuadra e kaltër fitoi me shifrat 74:54.
Ndeshja i ka takuar xhiros së 23-të të Superligës së Kosovës në basketboll. Ky derbi është dashur të luhet fundjavën e kaluar, por u shty për shkak të angazhimit me përfaqësuese të trajnerit të Yllit, Adis Beqiragiq dhe basketbollistit të Prishtinës, Lejson Zeqiri.
Çereku i parë i ndeshjes ishte i barabartë, ndërsa në çerekun e dytë u bë dallimi i madh. Prishtina e fitoi periudhën e dytë me rezultat 25:11, ndërsa më pas e kontrolloi ndeshjen deri në fund. Epërsia e Prishtinës vazhdimisht ishte shumë e lartë.
Kapiteni Dardan Berisha udhëhoqi Prishtinën me 27 pikë, pesë asistime e katër kërcime.
Brooks Debisschop shtoi 12 kërcime e gjashtë pikë, ndërsa Jan Palokaj realizoi dhjetë pikë e katër kërcime.
Edhe
Ylli shënon fitoren e parë, mposhti Sigal Prishtinën
Chris Harris i Yllit e mbylli ndeshjen me nëntë pikë e tetë kërcime. Henrik Shirko i kishte nëntë pikë e pesë kërcime, ndërsa më efikasi ishte Gëzim Morina me 11 pikë.
Tani Prishtina e Ylli kanë nga 40 pikë në pozitat një e dy. Lideri deri më tani ishte Ylli.
“Qëllimi ishte të fitojmë, pasi ndeshja vendoste se kush do të ishte lider i ligës. Më pas menduam për dallimin në pikë. Ishte një ndeshje e mirë e jona, sidomos në mbrojtje. Përqindja në gjuajtje ishte më e mirë se e Yllit. Në disa raste megjithatë gjuajmë më shpejtë se që duhet dhe kjo na largon nga loja jonë”, ka thënë trajneri i Prishtinës, Ahmet Kandemir. Ai ka shfrytëzuar rastin që të kritikojë gjyqtarët e basketbollit kosovar. “Ekipet kanë shkuar shumë përpara, ndërsa duhet që edhe gjyqtarët të ecin para”, ka shtuar trajneri turk.
I nervozuar dhe i dëshpëruar është shprehur trajneri i Yllit, Adis Beqiragiq. Ai ka thënë se ndihet i turpëruar për paraqitjen e Yllit. Beqiragiq ka udhëhequr Yllin drejt dy titujve të kampionit.
Edhe
Ylli fiton ndaj Sigal Prishtinës në sekondën e fundit
“Në aspektin mental nuk ishim të gatshëm për ndeshje. Koncentrimi nuk ishte fare në nivel. Kemi pasur përqindje shumë të dobët të gjuajtjeve. Të gjithë kanë luajtur nën nivelin e tyre. Na duhet Lis Shoshi për të përballur ekipet e mëdha. Ne jemi ekip i rrezikshëm por na duhet edhe një lojtar për rotacion. Më vjen turp të shoh lojtarët e Yllit të luajnë kështu. Për herë të parë këtë edicion ndihem i turpëruar për mënyrën se si kemi luajtur”, ka theksuar Beqiragiq. Ai javën e kaluar e udhëhoqi Bosnjë-Hercegovinën.
Në pesë xhirot e fundit të stinorit të rregullt, Prishtina e Ylli pritet të zhvillojnë garë të fortë për pozitën e parë. Në xhiron e ardhshme, Prishtina është mysafire e Vëllaznimit, ndërsa Ylli e pret Pejën. Është ky një tjetër derbi i madh.
