Prishtina fitoi në xhiron e 12-të të Superligës së Kosovës në Hendboll në konkurrencën e meshkujve, pasi e mposhti Llapin e vendit të fundit në tabelë, me rezultat, 44:27.
Vendësit e nisën shumë më mirë takimin dhe arritën të realizonin gola të shpejtë, sidomos në kundërsulme dhe ishin më të mirë në fazën e mbrojtjes, kurse mysafirët nuk arrinin t’i bënin ballë, transmeton Sporti në KTV.
Disa minuta para se skuadrat të shkonin në pushim mes pjesëve u pa një rritje e nivelit të lojës së llapjanëve, të cilët arritën ta ngushtonin epërsinë në gjashtë pikë.
Por, prishtinasit nuk lejuan befasi dhe e përfunduan pjesën e parë me shifrat, 22:16.
Në pjesën e dytë, “bardhekaltrit” vetëm e administruan lojën dhe arritën të triumfojnë me 17 pikë epërsi, 44:27.
Më të dalluarit te skuadra vendëse ishin Kushtrim Kastrati, Beni Syla dhe Agon Bajqinovci, të cilët shënuan nga tetë gola secili, kurse te Llapi lojë të mirë pati Besian Abazi poashtu me 8 gola.
Me këtë fitore, Prishtina arrin në kuotën e 22 pikëve, kurse Llapi që ka vetëm një fitore këtë edicion dhe 11-të humbje, mbetet në vendin e fundit me 2 pikë.
