Ministri i Mbrojtjes ka pritur në takim presidentin e Komitetit Olimpik të Kosovës Besim Hasani.
Ministri i Mbrojtjes u shpreh i nderuar për këtë takim dhe përgëzoi Hasanin për sukseset e sportistëve kosovarë, të cilët sipas tij, i kanë bërë krenarë të gjithë.
Më tej ministri i informoi zyrtarët e KOK-ut rreth procesit të tranzicionit të FSK-së dhe arritjeve gjatë fazës së parë 120 ditësh pas miratimit të ligjeve për Ministrinë e Mbrojtjes dhe FSK-së.
Në takim u diskutua rreth formalizimit të bashkëpunimit të KOK-ut me FSK-në në fushën e sportit.
“Kjo do të ndikonte edhe në masovizimin e sportit të të rinjve të vendit tonë”, tha ai.
Presidenti Hasani shprehu gatishmërinë që KOK-u ta përkrahë Ministrinë e Mbrojtjes dhe FSK-në në organizimin e pjesëtarëve të FSK-së nëpër klube në disiplina të ndryshme sportive, organizimin e garave si dhe në themelimin e federatës ushtarake të sporteve brenda FSK-së.
“FSK-ja në radhët e saj ka të përgatitur sportistë, të cilët me sukses mund të garojnë në gara ndërkombëtare”, tha Hasani.
Duke ndjekur praktikat e mira të disa ushtrive në Evropë, presidenti Hasani propozoi që disa nga elitarët e sportistëve të Kosovës të mund të bëheshin pjesëtarë të FSK-së.
Ministri Berisha e përkrahi këtë ide dhe është zotuar që do të hulumtohen modalitet më të përshtatshëm që sportistët elitarë të respektojnë FSK-në si pjesëtarë në uniformë, në përputhje me legjislacionin dhe procedurat në fuqi.
Ministri Berisha dhe Presidenti i KOK-ut Hasani u pajtuan që pa vonesë të themelohen grupet punuese nga të dy palët për hartimin e një memorandumi bashkëpunimi me qëllim të thellimit të bashkëpunimit institucional ndërmjet Ministrisë së Mbrojtjes dhe Komitetit Olimpik të Kosovës.
