Basketbollistët e Pejës nuk e patën aspak të lehtë avancimin në gjysmëfinale të Superkupës së Kosovës.
Kampionia në fuqi, Peja të enjten e eliminoi skuadrën e Prizrenit në çerekfinalen e luajtur në palestrën “13 Qershori” me rezultatin 92:81.
Prizreni e nisi më mirë takimin dhe çerekun e parë, e mbylli me rezultatin 24:19 përpara se të shkojë në pushim me një epërsi prej tri pikëve – 47:44. Megjithatë, Peja u rikthye fuqishëm në dy periudhat e fundit. Çerekun e tretë, Peja e fitoi 30:18, ndërsa të katërtin 18:16 për ta konfirmuar fitoren dhe kalimin në gjysmëfinale.
Amerikani Justin Davis ka udhëhequr Pejën drejt këtij triumfi, pasi ndeshjen e përfundoi me 29 pikë, 8 kërcime e 3 asistime.
Me lojë të mirë te Peja, u veçuan edhe Lis Shoshi (15 kërcime, 9 asistime) e John Chandler me 14 pikë.
Te Prizreni, fundori Ivan Koleviq pati 18 pikë, ndërsa Musab Mala, Arbër Sinani e Edmond Kryeziu shtuan nga 13 pikë secili, por që nuk arritën ta evitojnë humbjen nga Peja. Në gjysmëfinale, Peja do të përballet me fituesin e ndeshjes Golden Eagle Ylli – Vëllaznimi, që nis në orën 20:00.
Seria e ndeshjeve gjysmëfinale, do të mbahet të premten.