Një ditë para “El Clasicos” Zidane rithekson s’do të bëjnë gardë të nderit

Real Madridi nuk do t’ia bëjë kampiones së La Ligës, Barcelonës, gardën e nderit, kur këto skuadra do të takohen në “El Clasico” të dielën, ka deklaruar Zinedine Zidane një ditë para ballafaqimit.

Barcelona e fitoi titullin e kampionit vikendin e kaluar dhe përballë do ta ketë kampionin në fuqi të Evropës, Real Madridin, transmeton KTV.

“Pas Kupës së Botës për Klube, ata nuk e bënë atë për ne. Ata mund të thonë se nuk kanë marrë pjesë në garë, por kjo nuk është e vërtetë. Duhet ta fitosh Ligën e Kampionëve dhe të luash në të, dhe që të dyja ekipet ishin pjesëmarrëse në “Champions”. Nuk më takon mua të vendos për gardën e nderit, por ata nuk e bënë për ne. Ne, me gjithë respektin, nuk do ta bëjmë atë”, deklaroi Zidane.

Francezi iu referua asaj që ndodhi para “El Clasicos” së 23 dhjetorit, kur madrilenët u kthyen nga Emiratet e Bashkuara Arabe si fitues të Kupës së Botës për Klube. Barcelona nuk e bëri tunelin, ashtu siç është traditë për t’i respektuar kundërshtarët në Spanjë.

Barça e fitoi atë takim me rezultat 3:0.