Shoqata Kombëtare e Basketbollit Amerikan (NBA) dhe Federata e Basketbollit të Kosovës (FBK), të premten, kanë njoftuar për nisjen e partneritetit të ri që ka rezultuar me krijimin e ligës së parë të basketbollit në Kosovës, “Junior NBA”.
Kjo ligë inauguruese do të jetë për djem dhe vajza të moshës 11-14 vjeç dhe tërheqja e shortit do të bëhet të martën në Prishtinë. Në ceremoninë e hedhjes së shortit do të jetë i pranishëm edhe ish-lojtari i NBA-së, Jiri Welsch.
Ngjarja do të organizohet me pjesëmarrjen e 30 shkollave fillore nga e tërë Kosova, të cilave do t’u caktohet emri i një ekipi të NBA-së përpara se të pajisen me fanellat përkatëse të atij ekipi për ndeshjet e basketbollit.
Skuadrat e ligës “Junior NBA” në Kosovë do të ndahen në dy konferenca dhe gjashtë divizione, sikurse në NBA. Në fund, dy kampionët e konferencave përkatëse do të përballen mes vete për titullin e Ligës “Junior NBA” të Kosovës.
Në FBK e kanë vlerësuar lart këtë projekt, duke thënë se bëhet fjalë për bashkëpunimin me NBA-në. Sipas sekretares së përgjithshme të FBK-së, Elvira Dushku, kjo është një mundësi e artë për vajzat dhe djemtë në vend që të shfaqin talentin e tyre.
“Bashkëpunimi me NBA-në është një nga ndërmarrjet më të vlefshme të Federatës së Basketbollit të Kosovës, kryesisht për shkak të fuqisë së markës që NBA-ja sjell në këtë projekt. Jemi të lumtur që programi i Ligës së Junior NBA-së në Kosovë do t'u ofrojë mundësi vajzave dhe djemve në mbarë vendin që të shfaqin talentin e tyre për basketboll, ashtu që një ditë t'i kthejnë ëndrrat e tyre në realitet”, është shprehur Dushku.
Edhe
“Junior NBA Kosova”, projekt që vlerësohet lart
Ndërkohë, edhe nga NBA janë shprehur të emocionuar për këtë nismë që shihet shumë e rëndësishme për fëmijët kosovarë.
“Jemi shumë të lumtur që filluam partneritetin me Federatën e Basketbollit të Kosovës për të promovuar zhvillimin e basketbollit të të rinjve përmes startimit të ligës së parë Junior NBA në vend”, tha zëvendëspresidenti i NBA-së për Operacionet e Basketbollit për Evropë dhe Lindje të Mesme, Neal Meyer. “Rritja e pjesëmarrjes së djemve dhe vajzave është pjesë e misionit tonë për të promovuar vlerat e punës në grup, respektin dhe përfshirjen, duke frymëzuar dhe lidhur brezin e ardhshëm të lojtarëve dhe tifozëve përmes basketbollit”.
“Junior NBA” është program global i basketbollit për të rinjtë i ligës NBA që ua mëson djemve dhe vajzave aftësitë themelore dhe vlerat thelbësore të lojës - punën në grup, respektin, vendosmërinë dhe komunitetin - në nivelin bazë. Përgjatë edicionit 2021/22, Junior NBA do të përfshijë më shumë se 37 mijë të rinj nga 28 vende të Evropës dhe Lindjes së Mesme.
