“Egli Martin dhe Naim Fejzaj bashkojnë forcat në ringun e rërës” - kjo apo diçka e ngjashme u dëgjua fundjavën e fundit të qershorit në Festivalin e Mundjes të Zvicrës Verilindore. Në fillimet e karrierës së tij, emri ekzotik bëri bujë, por Naim Fejzaj ka kohë që është pjesëtar i zviceranëve verilindorë. I lindur në Appenzell, Fejzaj ishte pak i shqetësuar për emrin e tij para festivaleve të para të mundjes.
“Por unë shpejt kuptova se familja e mundjes është tolerante. Askund nuk kam qenë aq i mbështetur sa në skenën e mundjes”, pranon Naim Fejzaj.
28-vjeçari thotë se në fillim megjithatë i është dashur të durojë disa komente negative.
“Komentet e pamenduara” kishin ardhur më shumë nga kundërshtarët e tij, “nga publiku, ndoshta edhe pas shpine. Mirëpo, tani nuk vërej më asgjë”, thotë mundësi që i është futur këtij sporti në moshën 12-vjeçare me rekomandimin e një shoku nga shkolla.
Naimi ka lindur në Zvicër, nëna e tij është kroate, babai i tij kosovar dhe në shtëpinë e familjes Fejzaj fliten tri gjuhë.
Kritikat e shumta
Ai është ekzotik në sportin tradicional zviceran të mundjes, por nuk është i famshëm në publik në krahasim me yjet e futbollit Xherdan Shaqiri apo Granit Xhaka. Fejzaj bën një lidhje me ta:
“Mendoj se të gjithëve na është dashur të pranojmë shumë kritika dhe kemi vuajtur pasi jemi ngacmuar në shkollë - mund ta them këtë. Por pavarësisht të gjithave, ne ia dolëm, ia dolëm”, insiston Fejzaj.
Ata të gjithë do të duhej të kalonin këtë pengesë dhe të përballeshin me këtë luftë verbale.
“Duket se këto ngacmime vetëm na forcuan edhe më shumë. Besoj se me karakterin dhe forcën tonë kemi arritur shumë dhe mund të arrijmë akoma shumë në të ardhmen”.
Pikërisht këtë qëndrim dhe karakter të fortë, Fejzaj e tregon edhe në mundje. Ai është i gjatë 182 centimetra dhe peshon 110 kilogramë.
Më i përgatitur se kurrë
Atij i është dashur të luftojë për t'u rikthyer nga lëndimet më shumë se një herë. Ai duhej të përballonte plot tri operacione në gju. Pas këputjes së fundit të ligamentit të kryqëzuar, Fejzaj duhej të vendoste: “Ose ta mbyllja karrierën, ose duhej të ndryshoja diçka”.
Fejzaj vendosi për opsionin e dytë. Ai tani është aktiv në qendrën e performancës “Rotor” në qytetin e tij. Është në rrugën e suksesit dhe tani është më në formë se kurrë më parë në jetën e tij. Fejzaj tani stërvitet në mënyrë më profesionale, së bashku me sportistë profesionistë si skitarë apo çiklistë malorë. Këto stërvitje e afrojnë me rezultate të larta.
“Ka të bëjë gjithçka me forcën dhe qëndrueshmërinë. Mbi të gjitha kam fituar masë muskulore, shpejtësi, gjallëri dhe qëndrueshmëri”, insiston Fejzaj. “Jam në formë fantastike dhe më i përgatitur se kurrë më parë”.
Balancimi perfekt
Kur nuk është në stërvitje, Fejzaj punon si polimekanik. Për të kjo punë është ekuilibri perfekt mes karrierës sportive dhe profesionit.
“Është shumë mirë. Kur shkoj në punë pas stërvitjes së vështirë, mund të rikuperohem fizikisht”, tha ai.
Mundësi sheh ngjashmëri mes sportit dhe punës:
“Një gabim mund t'ju kushtojë shumë. Kështu që duhet të tregohem maksimalisht i kujdesshëm si në mundje ashtu edhe në punë. Vetëm në këtë mënyrë mund të arrish qëllimet tua”.
Fejzaj insiston se ka nevojë edhe për sport, por edhe për punë. Në mundje ai ka një synim të qartë dhe afatgjatë: Festivalin Zviceran të Mundjes 2025 në Mollis - para një publiku verilindor vendas, ku ai dëshiron të jetë 100 për qind gati. Këtë vit atij i mungoi kurora e më të mirit, por më 20 gusht ka një tjetër garë të rëndësishme, kampionatin zviceran.
“Të gjithë duan të kenë sukses. Edhe unë natyrisht. Por kam pësuar shumë lëndime vitet e fundit dhe më është dashur t'u mbijetoj goditjeve. Sigurisht, nëse më lejohet të shkoj drejt suksesit, atëherë do të jem më shumë sesa i lumtur”, shprehet ai.
Në fund të këtij muaji mund të kemi edhe një duel mes Naim Fejzajt dhe Wicki Joelit, mbretit në fuqi të mundjes.