Mërgim Berisha, talenti i Gjermanisë me rrënjë kosovare që synon të bëhet si Ibrahimoviqi

Fillimisht një vonesë pas testimit të dytë për koronavirus dhe pastaj gjithçka e qartë: Mërgim Berisha nuk dëshiron të ndalet nga ardhja e vonuar tek U21 i Gjermanisë. Mërgim Berisha është hapave të idhullit të tij, Zlatan Ibrahimoviqit, kanë shkruar të mërkurën mediumet gjermane. Superylli suedez dikur ka luajtur shtatë ndeshje me ekipin U21 të Suedisë, derisa Berisha 22-vjeçar, që është pjesë e RB Salzburgut, gjendet në Braunschweig për miqësoren kundër Sllovenisë që luhet të enjten, në prag të paraqitjes së gjashtë me ekipin e të rinjve të Gjermanisë, që drejtohet nga trajneri Stefan Kuntz. Mirëpo, sulmuesi i ri ka edhe më shumë ngjashmëri me punën totale të Ibrahimoviqit kur nis të flasë për 39-vjeçarin të cilin e quan futbollist të jashtëzakonshëm.

“Ai është modeli im dhe unë mendoj se ai është një lojtar unik. Meqenëse ne luajmë në të njëjtën pozitë, është e natyrshme që unë e shikoj Ibrahimoviqin dhe mundohem të shkoj hapave të tij”, thotë Berisha për televizionin e Federatës së Futbollit të Gjermanisë (DFB). “Po punoj shumë për të arritur diçka në karrierë”.

Synon vend titullari te RB Salzburgu

Berisha ka lindur në Berchtesgaden të Gjermanisë, por si lojtar është zhvilluar në Austri. Pas disa huazimeve nëpër skuadrat austriake, Berisha ka hedhur rrënjë të forta sportive te skuadra e RB Salzburgut, vetëm 26 kilometra larg vendlindjes së tij, që nga fillimi i këtij viti. Dhe, madje, shënoi në Ligën e Kampionëve për RB Leipzigun në ndeshjen kundër kampionit në fuqi të Evropës, Bayern Muenchenit. Ai gjithashtu u tregua i suksesshëm edhe ndaj Atletico Madridit, ku e dërgoi topin në rrjetë, por në fund UEFA vendosi që ai gol zyrtarisht të njihet si autogol.

Fakti që vendi i tij në skuadrën e Kuntzit u lëkund ditë më parë nuk kishte asnjë lidhje me një rënie të formës së Berishës. Gjashtë lojtarë të Salzburgut fillimisht ishin pozitivë, por më pas u ritestuan dhe rezultuan negativë në koronavirus. Berisha, i cili ka shtetësi kosovare dhe shqiptare, u regjistrua vonë në hotelin e skuadrës së Federatës së Futbollit të Gjermanisë (DFB) në Wolfsburg të martën. Megjithatë, ai nuk dëshiron të lejojë që kjo vonesë ta ndalojë pasi synon të vazhdojë të jetë titullar tek ekipi U21 i Gjermanisë, por edhe te RB Salzburgu.

“E vetmja gjë e rëndësishme për mua është ajo që po ndodh në këtë moment. Unë do të vazhdoj të punoj për veten time dhe pastaj gjithçka do të vijë vetë gjithsesi. Qëllimi im është të fitoj përkrahje te Salzburgu, që do të më ndihmojë të siguroj një vend titullari. Ky është synimi im dhe nuk do të më ndalojë asgjë”, ka insistuar Berisha, që ka një gol në pesë ndeshje me U21 të Gjermanisë.

Ka kontratë me ekipin austriak deri në vitin 2022

Ashtu siç dërgon rruga nga ekipi U21 në Përfaqësuesen A të Gjermanisë, që drejtohet nga Joachim Loew, Berisha pret që një rrugë e tillë ta dërgojë nga RB Salzburgu në një ekip dhe ligë më të fortë të Evropës. Për momentin ai e di se gjasat janë të vogla që të ftohet nga Loewi, për shkak se luan në kampionatin austriak dhe ende nuk e ka stabilizuar veten si titullar tek ekipi i tij. Kështu që një transferim në Bundesligë i Berishës në një të ardhme të afërt nuk përjashtohet. Berisha, aktualisht, ka kontratë me RB Salzburgun deri në vitin 2022.

Mbi të gjitha, rekordi i tij i mëparshëm në futbollin profesionist gjerman nuk është edhe aq pozitiv. Si huazim nga Salzburgu, Berisha luajti vetëm 22 minuta në pesë ndeshje kampionale në gjysmën e parë të vitit 2018 te klubi i kategorisë së dytë, FC Magdeburg. Ndërsa, dy vjet më vonë luajti 76 minuta kundër Bayernit në garën më elitare të Evropës – Ligën e Kampionëve.

“Gjithçka është e mundur, por një gjë është e sigurt se synimet e mia janë të mëdha për të ardhmen. Dua të shkoj hapave të idhullit tim, Ibrahimoviqit”, insiston Berisha.

Këtë edicion Berisha ka pesë gola dhe një asistim në 11 paraqitje te Salzburgu në të gjitha garat. Ai, krahas FC Magdeburgut, ka qenë i huazuar edhe te Lieferingu, LASK-u e Altachi.