Skuadra e Llapit i ka humbur dy ndeshjet e para të edicionit 2020/2021 në Superligën e Kosovës në futboll. Me paraqitjet dhe rezultatet ka marrë kritika nga trajnerët e futbollit Faruk Statovci, Erdin Hashani dhe Sami Sermaxhaj.
“Është e pafalshme për një ekip që synon Evropën të pësoj gol naiv. Llapi mund të këndellet sepse ka marrë lojtar cilësor. U duhet kohë të komponohen 15 futbollistë”, ka thënë Statovci, derisa Hashani ka theksuar se nëse Llapi kalon me këtë formë edhe dy xhirot e ardhshme, do ta ketë vështirë të luftoj për titull. “Nëse fillon deri ne xhiron e 4-5 ka qenë e vështirë. Nëse nuk e mposhtë një Trepça '89 cka mund të bësh me Ballkanin, Gjilanin e të tjerave që do t’i ketë. Do t’i kushtojnë në fund humbjet nga këto skuadra”, ka thënë Hashani.
Më i ashpër në kritikë ka qenë trajneri Sami Sermaxhaj. “Llapi është totalisht e paorganizuar. Shumë trajner mendojnë se përgatitja koncicionale është më e rëndësishme, jo që nuk është, por forma është loja. Nëse mendon një trajner që lojën t’ua udhëheq trajneri kondicional, është e gabuar”, ka thënë Sermaxhaj në emisionin “Sporti Total” të KTV-së.
