Kosova me pesë lojtare në top-ligat evropiane

Edhe një hendbolliste e Kosovës i është bashkuar elitës së Norvegjisë, njërës prej ligave më cilësore në botë për hendbollin e vajzave. Bëhet fjalë për 20-vjeçaren Elisa Mulaj, që nga të rejat është “graduar” në ekipin e të rriturave të klubit Aker.

Me Elisa Mulajn, Kosova tashmë i ka pesë lojtare në dy prej top-ligave botërore të hendbollit. Tri lojtare të Kosovës janë në elitën e Danimarkës e dy të tjera në elitën e Norvegjisë. Dy shtetet skandinave shquhen për hendbollin shumë të zhvilluar, përkatësisht për sistemin shumë të avancuar të rritjes së hendbollisteve të talentuara. Prej këtij sistemi po përfiton shumë edhe përfaqësuesja e Kosovës në hendboll. Në sportet e tjera, futboll, basketboll dhe volejboll, Kosova nuk e ka luksin të ketë kaq shumë lojtare në top-liga evropiane. Por në hendboll kjo është e mundur aktualisht.

Elisa Mulaj, së bashku me motrën e saj, Melisën, ka disa vjet që është pjesë e ekipeve përfaqësuese të Kosovës. Kanë luajtur për të rejat, ndërsa tani janë te senioret. Elisa luan në pozitën e alos dhe tani e pret punë e madhe për të fituar hapësirë tek Akeri.

Në edicionin e kaluar skuadra Aker ishte e 11-a në elitën e Norvegjisë. Në elitën norvegjeze është kthyer edhe Follo, ku paraqitet Mirela Gjikokaj, reprezantuesja tjetër e Kosovës.

“Nuk ka kënaqësi më të madhe se kur talentet e reja e bëjnë hapin nga ekipi i të rejave në ekipin elitë. Una Straith, Elisa Mulaj dhe Stella Kruse janë dëshmi që me të rejat punojmë mirë. Ato kanë nënshkruar kontratë me ekipin elitë, pas zhvillimit impresiv kampionatin e kaluar”, ka njoftuar klubi Aker.

Edhe Sporte të tjera 25 shk 2026 Tri hendbolliste të reja dhe tri të kthyera për ndeshjet vendimtare me Finlandën

Në Federatën e Hendbollit të Kosovës i janë gëzuar zhvillimit të Elisa Mulajt.

“Elisa është e lumtur që do të luajë në elitën norvegjeze, ndërsa është e përkushtuar që të punojë edhe më shumë për ngritje të mëtejme”, ka shkruar FHK-ja.

Në kampionatin elitar të Danimarkës paraqiten kapitenia e Kosovës, Leonora Demaj, organizatorja kryesore, Marigona Hajdari dhe beku Arlinda Hajdari. Marigona e Arlinda janë motra.

Demaj është pjesë e Ringkobingkut, ndërsa Marigona Hajdari së fundi u largua nga Ringkobingu dhe iu bashkua skuadrës më të madhe, Silkeborg.

“Për zhvillimin e mëtejmë ndryshimi i skuadrës ishte veprim i duhur. Loja e Silkeborgut më përshtatet shumë dhe besoj se do të jem e suksesshme”, ka thënë Marigona Hajdari.

Edhe Sporte të tjera 21 shk 2026 Mulaj debuton me sukses në elitën franceze

Arlinda Hajdari me skuadrën Bjerringbro ka kaluar nga kategoria e dytë në elitën daneze.

Kosova ka lojtare edhe në elitën e Zvicrës, që për nga niveli është ende para Norvegjisë e Danimarkës. Lojtare të Kosovës luajnë edhe në Gjermani e Francë, por jo në ligat elitare.