Përfaqësuesja e Tunizisë ka triumfuar ndaj Iranit në miqësoren e fundit para Kampionatit Botëror “Katari 2022” që nis të premten. Ndeshja e luajtur të mërkurën në Doha me dyer të mbyllura, ka përfunduar me rezultatin 2:0 në të mirë të Tunizisë.
Si Tunizia ashtu edhe Irani, do të paraqiten në turneun e Katarit dhe kjo ndeshje u ka shërbyer për ta parë formën para dueleve të fazës së grupeve. Të dy golat e fitores, Tunizia i shënoi në pjesën e dytë pasi e para u mbyll pa gola.
Naim Sliti në minutën e 85-të shënoi nga penalltia për ta zhbllokuar rezultatin, ndërsa golin e dytë për Tunizinë e shënoi Ali Abdi katër minuta më vonë.
Irani ndeshjen e mbylli me një lojtar më pak, pasi mbrojtësi Abolfazl Jalali u përjashtua me karton të kuq. Tunizia në Botëror, e luan ndeshjen e parë të martën e ardhshme kundër Danimarkës në kuadër të Grupit D, ndërsa do të përballet edhe me Australinë dhe Francën, që është kampione në fuqi. Tunizia në pesë paraqitjet e mëparshme në Kupën e Botës, asnjëherë nuk ka avancuar përtej fazës së grupeve. Ndërkohë, Irani është pjesë e Grupit B dhe ndeshjen e parë e luan me Anglinë, përpara se të përballet me Uellsin e SHBA-në.