IJF: Distria shfaqet atëherë kur duhet, Laura prej më të mirave në kategori

Xhudistët elitarë janë duke u përgatitur për garat e para të vitit, ndërsa në mendje e kanë qëllimin e madh – Olimpiadën. Top-xhudistët e Kosovës nuk dallojnë në këtë mes. Ata po përgatiten për garat e shumta që i presin, ndërsa fokusin e kanë që kulmin e formës ta arrijnë në Lojërat Olimpike “Parisi 2024”.

Gara e parë serioze e vitit do të jetë ajo Grand Prix në Portugali që mbahet prej 26 deri më 28 janar. Kosovën në Portugali e prezantojnë Loriana Kuka dhe Shpati Zekaj. Xhudistët e tjerë elitarë, duke përfshirë kampionet olimpike, Distria Krasniqi e Nora Gjakova, por edhe Laura Fazliun e Akil Gjakovën, startojnë prej Grand Slamit të Parisit, që mbahet prej 2 deri më 4 shkurt.

Në një analizë që Federata Ndërkombëtare e Xhudos ua ka bërë xhudistëve që janë në pozitat e para në ranglistën botërore, fokusi ishte edhe te Distria e Laura. Distria është e para në ranglistë në kategorinë deri 52 kg.

IJF ka shkruar se Distria është para francezes Amandine Buchard në renditje, porse Buchard e mposhti kosovaren në Masterin e vitit të kaluar.

“Distria nuk ishte mësuar me medalje të argjendta, por kjo ishte ngjyra e saj në vitin 2023. Nuk ka fituar asnjë ngjarje që nga Parisi, në shkurtin e kaluar. Megjithatë Distria kishte bilanc impresiv dhe të gjithë ne e dimë që ajo ia del kur ka vërtet rëndësi. Do të jetë vështirë që ajo të mposhtet në Paris”, ka shkruar IJF.

Edhe Sport 1 nën 2023 Kosova me dy bartëse të para e një të dytë në Evropian

Megjithatë xhudistja kryesore në 52 kg vazhdon të jetë japonezja Uta Abe, ndonëse ajo nuk është në pozitat kryesore në renditje. Kalimi i Abes është ndoshta sfida kryesore për Distrinë në vitin olimpik.

Laura Fazliu është e dyta në ranglistën e kategorisë deri 63 kilogramë. Më lart se Laura është vetëm kanadezja Catherine Beauchemin-Pinard.

“Laura Fazliu ka hapur rrugën e saj në kategori. Ka bërë emër për vete”, ka shkruar IJF.

Federata Ndërkombëtare ka thënë se xhudistet e tjera të Kosovës i kanë treguar Laurës se çka është e mundur të arrihet.

Edhe Luftarake 15 pri 2026 Distria në Tbilisi për titullin e katërt të Evropës

“Është 23-vjeçare, me sytë drejt sfidave të reja dhe e palëkundur në detyra. Deri në Masterin 2023 nuk kishte tituj të mëdhenj, ndonëse mori disa rezultate të rëndësishme. Ajo fitoi të artën në Masters dhe hyri në grupin e më të mirave të kategorisë deri 63 kg. Emri i Laurës mund të përmendet kur parashikohen medaljet olimpike për verën e ardhshme. Ajo do të jetë forcë e madhe në Paris, por asgjë nuk ka të garantuar. Kategoria është shumë e hapur”, ka shkruar IJF në analizën e liderëve të kategorive.

Kosova pritet të marrë pjesë me pesë xhudistë në “Parisi 2024”. Dhe të gjithë do të jenë kandidatë për medalje olimpike.