Hendbollisti perspektiv i skuadrës gjermane HSG Ostsee N/G, Adrian Halili, nga e mërkura (dje) është pjesë e Kombëtares U-20 të Kosovës, ka konfirmuar FHK-ja përmes faqes zyrtare.
“Me Halilin, Kombëtarja U-20 vlerësohet se fiton një hendbollist cilësor që luan në pozitën e pivotit (lojtarit të vijës). Ai ka gjatësi prej 187 centimetra dhe është i lindur në vitin 1999. Kombëtarja U-20, që do të marr pjesë në Kampionatin Evropian, Divizioni B, nga 19 deri më 30 korrik të këtij viti në Podgoricë të Malit të Zi, pritet të përforcohet edhe me lojtarin e krahut, Albin Xhafolli që me sukses po luan për skuadrën e madhe gjermane Gummersbach”, ka konfirmuar FHK-ja, transmeton Koha.net.
FHK-ja shton se, “kështu gjenerata e Jon Muqollit, Drenit Tahirukajt, Labinot Gubetinit, Art Luzhës dhe e lojtarëve tjerë perspektiv, me ardhjen e portierit Bardh Berisha nga Suedia, Rinor Avdullit nga Zvicra dhe sidomos Adrian Halilit e Albin Xhafollit, pritet të jetë pretendente për vendin e parë në Evropian”.
