Hendbollistët pas ndeshjes: Treguam shpirtin kundër Rumanisë, ishte fitore e merituar

Loja e sotme e Kosovës në hendboll kundër Rumanisë është lavdëruar nga “dardanët”.

Pas ndeshjes, hendbollistët dhe stafi i klubit e kanë cilësuar si lojë fantastike dhe e zhvilluar me motivacion të madh.

“Loja ka qenë fantastike, ishte me motivacion të madh. Lojtarët e kanë treguar vetën, kanë vulosur luftën dhe dëshirën që kanë pasur. Hendbolli i Kosovës është duke ecur mbarë”, ka deklaruar Bujar Qerimi, selektor i skuadrës.

Hendbollisti Valon Dedaj ka thënë se kundër Rumanisë kanë treguar shpirtin luftarak dhe sipas tij, kjo ishte fitore e merituar.

“Kjo ishte fitorja më e madhe në histori të hendbollit kosovar. E kemi treguar shpirtin tonë, kemi luftuar për këtë shtet, ishte fitore e merituar. Na mbetet të luajmë kundër Malit të Zi në Prishtinë”, ka thënë ai në një videomesazh pas ndeshjes.

E Sekretari gjeneral i Federatës së Hendbollit të Kosovës, Izet Gjinovci, ka deklaruar se skuadra ka shënuar histori të re në hendbollin e Kosovës, duke përmendur se janë gjasat për t’u kualifikuar në Euro 2022.

“Na duhet fitorja e sigurt ndaj Malit të Zi më 28 prill”, ka thënë ai.