-
Nga:
Arsim Maxhera
- 20 korrik 2021 16:06
- Shpërndaje në:
Udhëtime në shumë pjesë të Evropës do të kenë skuadrat kosovare të hendbollit. Plot tetë skuadra janë paraqitur për të garuar në gara kontinentale, si asnjëherë më parë.
Katër skuadrat e hendbollistëve dhe katër të hendbollisteve do të garojnë në Kupën Evropiane, që është niveli i tretë kontinental, pas Ligës së Kampionëve dhe Ligës Evropiane.
Shorti për dy raundet e para të EHF European Cup është tërhequr të martën në Vjenë.
E para që mësoi kundërshtarin ishte skuadra e hendbollisteve, Prishtina. Ajo po ashtu do ta ketë udhëtimin më të shkurtër. Do të luajë ndaj Vardarit të Shkupit. Ndeshja e parë është në Prishtinë, ndërsa e kthimit një javë më vonë në Shkup.
Ndeshja e para të raundit të dytë të Kupës Evropiane në konkurrencë të femrave luhen më 16 apo 17 tetor, ndërsa të kthimit një javë më vonë. Me raundin e dytë nis edicioni.
Hendbollistet e Ferizaj i pret udhëtim i gjatë dhe dukshëm më i vështirë. Ato do të përballen me skuadrën holandeze JuRo Unirek VZV. Ndeshja e parë është në Holandë, e kthimit në Ferizaj.
Në raundin e dytë të Kupës Evropiane pos Prishtinës e Ferizajt, garojnë edhe kampionia Vushtrria dhe fituesi i Kupës, Istogu.
Vushtrria, që ishte e vetmja bartëse në short, takohet me skuadrën zvicerane, Spono Eagles. Ndeshja e parë është në Vushtrri. Spono Eagles po ashtu vlerësohet kundërshtarë i vështirë.
Ndërkohë istogaset i pret një udhëtim shumë i gjatë. Istogu do të luaj me skuadrën nga Islanda, KA/Por. Në ndeshjen e parë Istogu është vendas.
Në të vërtetë një pjesë e këtyre udhëtimeve mund të mos realizohen, pasi në hendboll ndodh shpesh që të dy ndeshjet të luhen në një vend, për të zvogëluar shpenzimet.
“Përkrahësve u premtojnë se Istogu edhe këtë vit do të mobilizohet maksimalisht dhe do të jetë skuadër e denjë për garat evropiane. Edhe pse kemi të bëjmë me kundërshtar të fortë, nga shteti me hendboll të zhvilluar, Istogu do të jetë arrë e fortë për të gjithë”, thuhet në njoftimin e klubit Istogu.
Skuadrat e hendbollistëve garën në Evropë e nisin shumë më herët. Prishtina, Trepça e Vëllaznimi do të paraqiten në raundin e parë të Kupës Evropiane. Ndeshjet e këtij raundi luhen më 11/12 dhe 18/19 shtator.
Prishtina do të luajë ndaj ekipit nga Austria, Sparkase Schwaz Tirol, kurse në ndeshjen e parë është vendase.
Trepçën e pret një udhëtim i komplikuar në Izrael, ku duhet të luaj me skuadrën Holon Yuvalim. Ndeshja e dytë luhet në Izrael.
Vëllaznimi luan me skuadrën nga Luksemburgu, Kaerjeng. Takimi i parë është në Luksemburg.
Ndërkohë kampionia, Besa Famgas, është e vetmja që starton prej raundit të dytë të Kupës Evropiane. Skuadra pejane sërish do të takohet me Borcin e Banjallukës. Borci është skuadër serbe nga kryeqendra e Republika Srpska të Bosnjë-Hercegovinës. Ndeshja në Pejë, vjet, kishte kaluar pa telashe. Ndërkohë, kishte pasur pano anti-Kosovë dhe thirrje anti-Kosovë të huliganëve në hyrje të palestrës, para ndeshjes së kthimit në Banjallukë.
Borci për një gol kishte avancuar tutje.
“Kampionia jonë natyrisht do ta kërkoj revanshin”, ka njoftuar FHK-ja.
Ka një dekadë e gjysmë që skuadrat kosovare të hendbollit luajnë në kupa evropiane. Por nuk kanë arritur të kalojnë më shumë se një kundërshtar për edicion. Për shumicën, kalimi i një kundërshtari do të ishte sukses edhe këtë edicion. Ndërkohë disa skuadra, si Besa Famgas, kanë synime më të mëdha.
