Përzgjedhësi i Përfaqësueses së Kosovës, Alain Giresse është shprehur i lumtur me angazhimin e lojtarëve të tij dhe barazimin ndaj Zvicrës 1:1, të martën në Zuerich.
Tekniku francez ka thënë se në këtë ndeshje është ndjerë sikur po luan në Prishtinë.
“Kemi luajtur një ndeshje të mirë. Jam shumë i lumtur me ekipin dhe me angazhimin që kanë treguar në këtë ndeshje. Ishte një ndeshje e vështirë. E kam ditur që do të ketë shumë tifozë në këtë ndeshje dhe na është dukur sikur të luanim në Prishtinë. Këto dy ndeshje kanë qenë për të parë lojtarët sesi luajnë së bashku dhe këtë e kemi arritur dhe tani e kam një ide më të qartë sesi luajnë lojtarët. Dhe dy ndeshjet që i kemi bërë kemi mësuar shumë dhe janë tejet pozitive. Angazhimi dhe motivimi i lojtarëve dhe lojën që e kanë bërë në këto dy ndeshje do ta veçoja”, është shprehur Giresse.
