-
Nga:
Arsim Maxhera
- 17 mars 2020 17:49
- Shpërndaje në:
Thuajse të gjitha skuadrat e Superligës në basketboll i kanë liruar lojtarët e huaj. Skuadrat kanë ndërprerë stërvitjet dhe me shumë mundësi nuk do t’i rifillojnë deri në verë.
Federata e Basketbollit të Kosovës brenda javës pritet të publikojë vendimin për të mos e vazhduar edicionin 2019\2020. Aktualisht garat janë të pezulluara për shkak të përhapjes së koronavirusit.
Burime të Koha.net brenda FBK-së kanë bërë të ditur të martën pasdite që edicioni nuk do të vazhdojë. Është duke u diskutuar nëse duhet të shpallen kampionët. Por kjo me shumë mundësi nuk do të ndodhë. Edicioni 2019\2020 pritet të mbetet pa kampionë dhe të njihet si i anuluar.
Brenda FBK-së, përkatësisht Bordit të federatës, ka të tillë që mendojnë se skuadrat që janë të parat në tabelë të shpallen kampionë. Por më i madh është numri i atyre që mendojnë se kampionët nuk duhet të shpallen.
“Do t’i anulojmë garat. Por sot nuk do të ketë ndonjë vendim. Zyra e Federatës është duke e përpiluar vendimin, mbështetur në bazë ligjore. Kjo merr pak kohë, pasi situata nuk është e thjeshtë. Ka pak dilema për shpalljen e kampionëve, por po pritet të përmbyllet edicioni pa ndarë tituj. Vetëm të shpallet i anuluar. Vendimi do të vlejë për të gjitha kategoritë”, ka thënë burimi brenda FBK-së.
Në Superligën e meshkujve udhëheq Sigal Prishtina që i ka 42 pikë, një më shumë se Rahoveci e dy më shumë se Golden Eagle Ylli. Ndeshja Sigal Prishtina – Rahoveci është pezulluar një ditë para se të luhej.
Kupën e Kosovës e ka fituar Peja.
