Futsallit kosovar së fundmi i është shtuar edhe një klub, FC Prishtina 01.
Edhe pse përkundër kualiteteve që posedon skuadra, klubi këtë edicion do të garojë në Ligën e Parë në futsall. Kryetar i klubit është zgjedhur Malsor Buzuku, ndërsa stërvitjet kanë filluar tash e disa javë, transmeton kp.
Nën drejtimin e Synaj Keqit, skuadra po punon intensivisht dhe është gati që këtë javë ta fillojë kampionatin. Ndihmëstrajner është Haki Ahemeti.
Kjo skuadër ka angazhuar reprezentues të Kombëtares së Kosovës dhe të Shqipërisë. Agon Ramadani që ka luajtur te Feniksi dhe Kombëtarja shqiptare, ka nënshkruar për klubin. Aty janë edhe reprezentuesit e Kosovës, Oso Gjinovci, Getart Hyseni e Nuhi Krasniqi. Po ashtu pjesë e skuadrës do të jenë edhe dyshja me përvojë kapiteni Korab Muharremi dhe Durim Qorri. Prishtina ka nënshkruar edhe me lojtarë të tjerë si Besnik Selmani, Shefki Kamberi, Dardan Berisha, Berat Hamiti, Haris Zeneli, Endrit Hajdini, Shpat Hashani, Ari Kaqanolli, Enis Hoxha e Andi Oruqi.
Objektivi i klubit është që të ngjitet në Superligë dhe të ketë paraqitje sa më të mirë në Kupën e Kosovës.
