Franca është kampione e Evropës në hendboll. Në finalen shumë dramatike, Franca e mposhti Danimarkën me rezultatin 33:31. Ndeshja e së dielës mbrëma në Koeln të Gjermanisë u vendos pas dy vazhdimeve nga pesë minuta. Finalen e përcollën rreth 20 mijë shikues.
Ndeshja ishte shumë e fortë dhe thuajse e barabartë nga fillimi deri në fund.
Në pjesën e parë danezët kishin epërsi deri në tri gola, ndërsa pas 30 minutave lojë rezultati ishte 14:14. Danezët ishin në epërsi edhe në pjesën e dytë, deri në minutën e 54-t, kur Franca kaloi para 25:24. Fundi ishte dramatik, ndërsa koha e rregullt nuk dha fitues. Pas 60 minutave lojë, rezultati ishte 27:27.
Në vazhdime francezët ishin më të mirë për ta siguruar titullin e kampionit. I shënuan gjashtë gola, ndërsa i pranuan katër për fitoren 33:31.
Franca tashmë i ka katër tituj të Evropës. Është edhe kampione olimpike në fuqi. Në Lojëra Olimpike francezët kanë tri medalje të arta. Në Botërorin e vitit të kaluar Franca ishte nënkampione, ndërsa i ka gjashtë tituj të botës.
Më i miri i finales u shpall portieri i Danimarkës, Emil Nielsen. Ai i kishte plot 15 pritje. Legjenda Mikkel Hansen i kishte nëntë gola për Danimarkën. Mathias Gidsel i realizoi tetë gola nga tetë tentime për Danimarkën.
Te Franca më efikasi ishte Ludovic Fabregas me tetë gola.