"Finalja" në Gjakovë ka ardhur papritur për të dy skuadrat që paraqiten në të. Te Vëllaznimi nuk kanë besuar se do të vijnë në gjendje që në ndeshjen e fundit të mund të sigurojnë mbetjen në elitë. Gjilani deri vonë vlerësohej pretendent për titull dhe te kjo skuadër nuk kanë besuar se në ndeshjen e fundit do të jenë të detyruar të marrin pikë për të shmangur barazhin.
Në të vërtetë ndeshja Vëllaznimi - Gjilani nuk është ndonjë finale, por vlerësohet se ka peshën e saj. Luhet të shtunën (sot) nga ora 16:00 në stadiumin e qytetit në Gjakovë. Ndeshja do të vendosë se cila prej këtyre dy skuadrave do të përfundojë edicionin në pozitën e nëntë dhe kështu do të paraqitet në barazh, e cila do të sigurojë mbijetesën me pozicionimin në vend të tetë. Kjo ndeshje i paraprin asaj për titull, që do të luhet të dielën ndërmjet Prishtinës dhe Dritës, shkruan sot Koha Ditore.
Skuadra e pozitës nëntë në barazh do të luajë me Ferizajn, që do të përfundojë stinorin në vendin e katërt në Ligën e Parë. Fituesi edicionin tjetër do të luajë në Superligë. Por ndeshja e barazhit vlerësohet me "rrezikshmëri" të lartë dhe skuadrat janë shumë të interesuara që të shmangun atë.
(Artikullin e plotë mund ta lexoni në numrin e sotëm të Kohës Ditore)