FIFA në presion për të hetuar futbollistët rusë

FIFA është në presion për të hetuar se cilët reprezentues të Rusisë janë të përfshirë në skandalin nacional të dopingut, bën të ditur “Daily Mail”, transmeton “Koha Ditore”.

Agjencia Botërore e Antidopingut (WADA) i ka shkruar FIFA-s dhe federatave të tjera ndërkombëtare duke ua kujtuar atyre përgjegjësinë për të ndjekur rastet e dopingut kundër sportistëve rusë të përfshirë.

WADA po ashtu i ka ofruar FIFA-s të vihet në kontakt me kallëzuesin rus Grigory Rodchenkov, ishkreu i laboratorit të antidopingut në Moskë. Rodchenkov, që është në programin e mbrojtjes së dëshmitarit në SHBA, ka ikur nga Rusia i frikësuar për jetën e tij. Ai u ka ofruar ndihmë federatave ndërkombëtare që të hapin rastet kundër sportistëve.

WADA do t’i ofrojë FIFA-s dhe federatave të tjera mundësinë për të kontaktuar Rodchenkovin dhe të përdorin deklaratat si dëshmi. Më tepër dëshmi do të ofrohen nga të dhënat që WADA i ka marrë nga laboratori i Moskës këtë muaj. Kjo edhe më tej pritet të vërtetojë se qindra sportistë rusë ishin të dopinguar. Problemi për FIFA-n është se Rusia do të organizojë Botërorin 2018.