Federata spanjolle kundërshton marrëveshjen e ligës në vlerë prej 2.7 miliardë eurosh

Federata e Futbollit të Spanjës, ka dalë kundër marrëveshjes të propozuar nga liga spanjolle me një fond investimesh, duke thënë të mërkurën se është e paligjshme dhe mund të dëmtojë konkurrencën në një afat të gjatë. Qëndrimi i federatës erdhi një ditë para se klubet nga divizioni i parë dhe i dytë në Spanjë të votonin nëse do të miratonin marrëveshjen që siguronte 2.7 miliardë euro për të rritur financat e klubeve dhe për të ndihmuar ligën të rritet.

Real Madridi dhe Barcelona tashmë e kishin kundërshtuar marrëveshjen me fondin e investimeve “CVC”, duke thënë se megjithëse do të siguronte një fluks parash gjatë tre viteve të ardhshme, përfundimisht do të dëmtonte të drejtat e transmetimit të ekipeve në një afat të gjatë. Reali paralajmëroi të martën se do ta padisë presidentin e La Ligas, Javier Tebasin. Federata spanjolle tha se marrëveshja 50-vjeçare mund të “ndikojë në mënyrë të pakthyeshme në të ardhmen e garave”. Po ashtu, shtoi se liga nuk kishte të drejtë të nënshkruante një marrëveshje të tillë, dhe se ajo mori disa ankesa nga klubet. Liga, e cila priste të kishte votat e shumicës së klubeve për të miratuar marrëveshjen, iu përgjigj deklaratës së federatës duke thënë se ajo “hodhi poshtë opinionet e saj subjektive dhe të rreme” në lidhje me marrëveshjen. Liga tashmë kishte kundërshtuar deklaratën e Real Madridit duke thënë se kishte mbështetjen e nevojshme ligjore që marrëveshja të kalonte. Gjithashtu akuzoi Realin për kërcënimin e klubeve të tjera me “metoda shtrënguese”. Real Madridi dhe federata kanë qenë shpesh në kundërshtim me ligën dhe presidentin e saj, Javier Tebasin.