Kur Xavi Hernandez u kthye si trajner i Barcelonës katër muaj më parë, skuadra që e kishte ndihmuar ta çonte drejt madhështisë si lojtar po luftonte për të marrë ndonjë fitore ndaj rivalëve më modestë. Pas një fillimi të vështirë, Xavi tani e ka kthyer Barcelonën në garën për titull në La Liga pas një serie të fitoreve të mëdha që kulmuan me triumfin 4:0 ndaj Real Madridit përpara një pushimi dyjavor ndërkombëtar. Barcelona ishte në vendin e shtatë dhe 16 pikë prapa liderit të ligës spanjolle, Realit në fillim të dhjetorit pas humbjes 1:0 ndaj Betisit, pengesa e vetme në ligë nën drejtimin e Xavit. Që atëherë, Barcelona ka regjistruar 12 ndeshje pa humbje (nëntë fitore dhe tre barazime), dhe ka fituar pesë ndeshje rresht në ligë me rezultatin e përgjithshëm 18:2. Barcelona është ende 12 pikë prapa Real Madridit. Por, një fitore ndaj Sevillas të vendit të dytë në “Camp Nou” të dielën do t'i barazonte me pikë me skuadrën andaluziane. Barcelona, gjithashtu, ka një lojë më shumë të luajtur se rivalët e saj në ligë.
“Ne kemi ende shpresë për të fituar titullin dhe do ta mbajmë atë gjallë deri në fund”, tha mesfushori i Barcelonës, Sergio Busquets. “Ne do të duhet të fitojmë ndeshjet tona dhe të shohim se çfarë do të ndodhë. Jemi në një ecuri shumë të mirë. Ky është mentaliteti që duhet ta kemi për të mbajtur gjallë shanset tona”.
Barcelona pret një ekip të Sevillas që është në rënie. Ka barazuar shtatë nga nëntë ndeshjet e fundit të ligës, përveç eliminimit nga Liga e Evropës. Kjo ecuri zhgënjyese erdhi pasi klubi solli Anthony Martialin dhe Tecatito Coronan në afatin kalimtar të janarit me synimin për të sfiduar Realin për titullin e kampionit. Barcelona, ndërkohë, po korr përfitimet e një oferte jashtëzakonisht të suksesshme për të përforcuar sulmin e saj në janar me transferimin e Pierre-Emerick Aubameyangut, Ferran Torresit dhe Adama Traores. Aubameyangu ka shënuar nëntë herë në vetëm 11 paraqitje, përfshirë dy gola në fitoren ndaj Realit në “Santiago Bernabeu”. Torres shënoi gjithashtu kundër Madridit për të çuar numrin në gjashtë gola që nga kthimi në Spanjë. Ardhja e tyre i ka dhënë Xavit lojtarët që i nevojiteshin shumë mesfushës së Barcelonës. Barcelona ka bërë paraqitje të shumta me katër gola të shënuar, përfshirë “El Clasicon” dhe fitoret ndaj Atletico Madridit, Athletic Bilbaos, Valencias dhe Osasunas. Ndërsa, Xavi ka përfituar edhe nga rikthimi i Ousmane Dembeles dhe Pedri Gonzalezit, të cilët u lënduan në fillim të sezonit. Busquets e vlerëson trajnerin për pjesën më të madhe të kthesës që ekipi ka bërë qëkur ai zëvendësoi Ronald Koemanin e shkarkuar. Xavi, tha Busquets, ka insistuar që ta kthejë Barcelonën në lojën e njëjtë me pasime precize dhe presion intensiv që paraardhësit Pep Guardiola dhe Luis Enrique e përdorën për ta udhëhequr skuadrën drejt trofeve të shumtë.
“Unë mendoj se më parë gjërat nuk ishin bërë në mënyrën më të mirë. Trajnerët që kanë qenë këtu kanë ardhur me idetë e tyre. Xavi është një vazhdimësi e trajnerëve, si Pep Guardiola dhe Luis Enrique”, tha Busquets. “Ai ka punuar shumë, mbi të gjitha në fillim. Nuk ishte e lehtë. Kishte shumë lojtarë që nuk e njihnin këtë stil loje. Ka kërkuar shumë punë, shumë praktikë, shikim videosh, në përpjekje për t'u përmirësuar”.
Real Madridi do të vizitojë Celta Vigon të shtunën, duke synuar të lërë pas humbjen nga Barcelona përpara se të luajë te Chelsea në çerekfinalen e Ligës së Kampionëve javën e ardhshme. Trajneri i Madridit, Carlo Ancelotti, nuk do të jetë ndaj Celtas për shkak se rezultoi pozitiv me koronavirus të mërkurën. Eden Hazard, po ashtu, do t’i mungojë Realit. Ndërkohë, Atletico gjithashtu mund ta arrijë Sevillan këtë fundjavë. Skuadra e Diego Simeones pret Alavesin të shtunën dhe më pas do ta vizitojë Manchester Cityn më 5 prill në çerekfinalen e Championsit.
