Driton Kuka, trajneri i vetëm në takimin e nivelit më të lartë të xhudos

Këtë javë në Olbia të Italisë është mbajtur një takim i drejtuesve më të lartë të Federatës Ndërkombëtare të Xhudos (IJF). Është diskutuar për rregullat e xhudos për ciklin e ardhshëm olimpik, atë për “Parisi 2024”. Në takimin e thirrur nga presidenti i IJF-së, Marius Vizer, ishin anëtarët e Bordit Ekzekutiv të Federatës Ndërkombëtare, udhëheqësi i Institutit të xhudos Kodokan, kryetarja e Komisionit të Sportistëve dhe trajneri i Kosovës, Driton Kuka. Kuka ishte i vetmi trajner botëror në takimin ku u vendos për ndryshimet në rregulla dhe ku prezent ishin njerëzit vendimmarrës të këtij sporti.

“Rregullat kanë ndryshuar pak. Janë bërë disa përmirësime ku është vlerësuar se ka nevojë. Natyrisht, si i vetmi trajner në takim, kam dhënë kontributin në të mirë të xhudos, që sporti ynë të bëhet edhe më interesant dhe më i pranueshëm për masën. Mund të them që trajtimi ndaj meje ishte shumë i mirë. Është përkrahur çdo ide e imja”, ka thënë Kuka të premten për KOHËN.

“Ishte përvojë e veçantë. Bëhet fjalë për nivelin më të lartë të mundshëm. Isha pjesë aktive e diskutimeve ku flitet për rrugën e sportit tonë në të ardhmen”, ka shtuar Driton Kuka, i njohur gjerësisht tashmë si njëri prej trajnerëve më të mirë në botë në sportin e xhudos.

Njohjet për Kukën tashmë po vijnë edhe nga asociacionet ndërkombëtare. Ai është nderuar me ftesë nga IJF-ja për këtë takim, ndërsa prej vitit të kaluar është pjesë e Komisionit të trajnerëve në Unionin Evropian të xhudos.

Nxënësit e Kukës kanë fituar të gjitha medaljet e mundshme në nivelin superior. Ndër të tjera i kanë tri medalje të arta olimpike.