Manchester City ka treguar paraqitje të shkëlqyer të shtunën në derbin kundër Liverpoolit, dhe mban ende gjallë shpresat për titull kampioni në Premier League.
City i Pep Guardiolës në ndeshjen e parë të xhiros së 29-të të elitës angleze të futbollit, fitoi ndaj Liverpoolit të Juergen Kloppit, 4:1, me rikthim të rezultatit.
Kjo fitore u arrit pavarësisht mungesës së sulmuesit më të mirë të skuadrës, Erling Haaland.
Mohamed Salah kaloi mysafirët në epërsi prej një goli në minutën e 17-të pas një veprimi të mirë.
Vetëm dhjetë minuta zgjati festa e mysafirëve, pasi Julian Alvarez barazoi shifrat në 1:1.
53 sekonda pasi nisi pjesa e dytë, Riyad Mahrez pas një kundërsulmi të shpejtë pasoi për Kevin de Bruynen që nuk e pati vështirë të shënonte nga afërsia.
Iklay Guendogan shënoi për 3:1 në minutën e 53-të, ndërsa Jack Grealish vulosi rezultatin përfundimtar të takimit, në minutën e 74-t.
Pas 28 ndeshjeve të luajtura, City ka 64 pikë, ndërsa Liverpooli mbetet me 42 pikë, por me një ndeshje më pak të luajtur.