Përzgjedhësi i Kosovës, Bernard Challandes beson se “Dardanët” ndaj Suedisë do të dalin në fushë për ta konfirmuar formën e mirë të muajit shtator.
Challandes ka thënë se ka mbetur i kënaqur me paraqitjet e ekipit muajin e shkuar dhe shpreson që edhe ndaj Suedisë të ketë një lojë të tillë. Megjithatë, ai ka thënë se Suedia mbetet një kundërshtar i fortë dhe këtë e ka treguar në të gjitha ndeshjet që i ka luajtur deri më tani.
“Do të luajmë kundër një ekipi të fortë. Kemi luajtur në shtator ndeshje të mira dhe duam ta konfirmojmë formën që e kemi pasur në shtator. Është e qartë që Suedia është kundërshtar shumë e fortë dhe këtë e ka treguar në të gjitha ndeshjet që ka luajtur, përfshirë edhe Kampionatin Evropian. Presim një ekip shumë të fortë në aspektin fizik por edhe në aspektin individual sepse ka lojtarë që mund ta bëjnë dallimin në ndeshje”, është shprehur Challandes.
“Edhe për këtë ndeshje ka presion sikurse në çdo ndeshje tjetër. Do të luajmë kundër një ekipi që në të njëjtin stadium e ka mposhtur Spanjën dhe presioni është normal jo vetëm në ekipin tonë, por çdo skuadër tjetër”, ka thënë ai.
Challandes ka pranuar se Suedia ka përvojë të madhe dhe dueli ndaj Kosovës është një ndeshje normale.
“Suedia ka përvojë dhe ka luajtur në shumë turne të mëdhenj. Po ashtu, lojtarët e Suedisë kanë luajtur edhe në Ligën e Kampionëve. Kështu që, për ta dueli me Kosovën është një ndeshje normale”, shtoi Challandes.
Challandesi ka thënë se Kosova duhet ta mbajë modestinë e saj, por të vazhdojë punën që të jetë kundërshtare e fuqishme përballë çdo ekipi.
Për mungesat e mundshme të Suedisë, përzgjedhësi i Kosovës ka thënë se edhe nëse mungon Victor Lindeloffi, Suedia ka mjaftueshëm lojtarë të tjerë të mirë. E ka konsideruar kombëtaren rivale si ekip kompakt e kreative.
Challandesi ka komentuar edhe mungesën e sulmuesit Zlatan Ibrahimoviq.
“Nuk mund të them nëse Suedia është më e mirë apo më e dobët pa Ibrahimoviqin. Mund të them se është një ekip tjetër me Ibrën edhe pa të. Në Prishtinë luajtëm kundër Ibrahimoviqit dhe ai pati një paraqitje të mirë duke u treguar si lojtar i rëndësishëm. Ne patëm vështirësi ndaj Suedisë me Ibrahimoviqin. Por edhe pa të në sulm, do të jetë sërish vështirë për ne”, ka thënë ai.
