Mbrojtësi i krahut të majtë, Valentin Barco, do të jetë përforcimi i parë i Brightonit në afatin kalimtar të janarit.
Mediumet britanike kanë raportuar të martën se Brightoni tashmë ka arritur marrëveshje me Boca Juniorsin që do të zyrtarizohet gjatë kësaj jave. Për transferimin e Barcos skuadra angleze ka paguar dhjetë milionë euro, ndërsa 19-vjeçari do të firmosë kontratë afatgjate me Brightonin.
Barco vlerësohet si njëri prej lojtarëve më të talentuar në Argjentinë, ndërsa në ekipin e parë të Boca Juniorsit është promovuar verën e fundit.
Në 35 paraqitje në të gjitha garat Barco ka shënuar një gol dhe ka bërë katër asistime, ndërsa me Bocan ka kontratë deri në fund të këtij viti.
