Pas nëntë fitoreve radhazi, Brazili është ndalur me barazim pa gola në udhëtim te Kolumbia, në sfidën e vlefshme për kualifikimet e Botërorit 2022 në Amerikën e Jugut.
Brazili vazhdon të mbetet në vendin e parë me 28 pikë pas 10 ndeshjeve, ndërsa Kolumbia është e pesta me 15 pikë.
Argjentina në anën tjetër deklasoi Uruguain duke e mposhtur me rezultat 3:0. Leo Messi, Rodrigo De Paul dhe Lautaro Martinez realizuan në fitoren e argjentinasve, që renditen në pozitën e dytë me 22 pikë, ndërsa Uruguai është i katërt me 16 pikë.
Ekuadori është i treti po ashtu me 16 pikë. Ndërkohë, Paraguai mban vendin e gjashtë me 12 pikë, Peruja e shtata me 11 pikë, Kili i teti me 10 pikë. Bolivia me nëntë pikë dhe Venezuela me shtatë ndajnë pozitat e fundit në tabelë.
Në Botëror kualifikohen direkt katër pozitat e para, ndërsa pozita e pestë luan në play-off.
