-
Nga:
Arsim Maxhera
- 16 janar 2022 20:41
- Shpërndaje në:
Ramiz Brahimaj po e vazhdon karrierën në UFC, serinë më të madhe të Arteve Marciale të Përziera (MMA). Brahimaj të shtunën mbrëma ishte pjesë e ngjarjes “UFC on ESPN”, që u mbajt në Nevada të SHBA-së. Në kuadër të kategorisë uelter, Brahimaj u përball me luftëtarin me përvojë dukshëm më të madhe, Court McGee.
McGee ka dominuar luftën në kafaz dhe ka fituar me vendim unanim të gjyqtarëve. Gjyqtarët e vlerësuan amerikanin fitues në të gjitha tri raundet.
Brahimaj 29-vjeçar është i lindur në New York. Në MMA është nga viti 2014, ndërsa bilancin e ka nëntë fitore e katër humbje.
Në UFC po ka më shumë telashe në fillim të karrierës në këtë seri. Fillimisht humbi nga Max Griffin më 7 nëntor të vitit 2020. Vendimin për ndërprerje të luftës e mori mjeku. U kthye me fitore ndaj Sasha Palatnikov, më 21 gusht të vitit të kaluar. Ka shpresuar të rreshtojë dy fitore, por McGee ishte dominues të shtunën. Amerikani 37-vjeçar është në UFC që nga viti 2010, ndërsa ka 19 luftëra deri më tani.
“Përfundimisht nuk ishte nata ime. Është pjesë e këtij sporti që e dua aq shumë. I heq kapelën kundërshtarit. Ishte nder për mua të ndaj oktogonin me të. Është garues i madh dhe njeri edhe më i madh. Do të pranoj këtë mësim dhe do të bëhem vetëm edhe më i mirë. Nëse jeta më ka mësuar diçka është se dështimi më ka ndihmuar të bëhem edhe më i mirë”, ka shkruar Brahimaj të dielën.
Brahimajn nuk e ka përcjellë fati në fillim të karrierës në UFC. Ai zbuloi se ka një tumor në sy, disa ditë para se t’i paraqitej mundësia për të fituar kontratë në UFC. E kaloi këtë sfidë dhe debutoi. U kthye edhe pasi në luftën e parë pësoi lëndim serioz të veshit.
“Kam pasur operacionet dhe incidentin me veshin në debutimin tim. Por nuk jam dorëzuar. Kam punuar shumë dhe jam kthyer për të shënuar fitoren e parë. Tani do të kthehem në palestër dhe do të punoj edhe më shumë”, ka theksuar Brahimaj.
Ai është shqiptari i dytë në UFC. Karrierë më të gjatë dhe për momentin edhe më të suksesshme ka Ilir Latifi.
