Rodrygo i Real Madridit u pyet të mërkurën se cila ishte këshilla më e mirë që e kishte marrë nga Karim Benzema dhe ai u përgjigj shpejt: “T’ia pasojmë topin”. Ka qenë një strategji e arsyeshme për Real Madridin, numri nëntë i të cilit do të jetë lojtari më i rrezikshëm në fushë në finalen e Ligës së Kampionëve të së shtunës kundër Liverpoolit dhe që ka qenë padyshim lojtari më i mirë në botë gjatë gjithë sezonit.
49 golat e Benzemas në 52 ndeshje i lënë nën hije 33 golat në 59 ndeshjet e Mohamed Salahut, ndërsa edhe Kylian Mbappe, i cili ka refuzuar Real Madridin, është inferior, me 43 gola në 49 ndeshje. Nëse Real Madridi mund Liverpoolin për të fituar trofeun e 14-të evropian, pritet që Benzema të mundë gjithashtu Salahun dhe Sadio Manen për të fituar “Topin e Artë” të tij të parë.
Këtë sezon, Benzema ka shënuar më së shumti gola në karrierë për Real Madridin dhe më së shumti në karrierën e tij në Champions. Ai është bërë lojtari më i vjetër që ka shënuar “hat-trick” në këtë garë dhe golashënuesi francez më produktiv në histori. Nëse ai shënon dy gola këtë fundjavë, ai do të barazojë rekordin e Cristiano Ronaldos në Ligën e Kampionëve prej 17 golash, numri më i madh i shënuar ndonjëherë nga një lojtar në një turne të vetëm. Zinedine Zidane, të cilin Benzema e përshkroi si një vëlla më të madh, tha se Benzema ishte “një dhuratë për këdo që e do futbollin”, “një futbollist total” dhe “më i miri”. Ish-fituesi i “Topit të Artë”, Jean-Pierre Papin, tha: “Benzema ka fuqinë e Ronaldos, shpejtësinë e Ronaldinhos, klasën e Henryt dhe instinktin e David Trezeguetit”.
“Ne gjithmonë e kërkojmë atë”, pranoi Rodrygo. “Ai është fenomenal”.
Benzema ka shënuar dhjetë gola në fazën e nokautit, duke tronditur kundërshtarët më të mirë, përfshirë një “hat-trick” kundër Paris Saint-Germainit, një “hat-trick” kundër Chelseat dhe një dygolësh kundër Manchester Cityt.
“Madridi fitoi sepse ka Benzeman dhe Chelsea jo”, shkruante gazeta “AS pas çerekfinales”. “Realiteti është se askush nuk e ka Benzeman, i cili luan në gjashtë pozita të ndryshme”.
Të dielën, ndërsa Real Madridi ishte ende i tronditur nga refuzimi i Mbappes, është e pamundur të mos kujtojmë se Benzema mund të kishte marrë frymë i lehtësuar. Në fund të fundit, ka qenë në mungesë të Ronaldos që Benzema ka lulëzuar, rritja e përgjegjësisë dhe rëndësisë duke nxitur diçka te francezi që e ka shtyrë atë të mbushë boshllëkun për të arritur në lartësi të tilla spektakolare.
“Ai është një lojtar që ndihet gjithnjë e më shumë si një lider çdo ditë, ai ndihet më i rëndësishëm në ekip”, tha Carlo Ancelotti. “Kjo është ajo që bën dallimin tek ai, ky personalitet”.
Për shumë vite, gjithmonë supozohej se Benzema mbeti i pavlerësuar, një lojtar që mund të admirohej gjithmonë te Real Madridi, por kurrë nuk do të konsiderohej si një nga sulmuesit më vdekjeprurës në lojë. Roli i tij mbështetës për Ronaldon dhe një mungesë gjashtëvjeçare te Franca, përfshirë Kupën e Botës që francezët e fituan në vitin 2018, luajtën një rol të madh në këtë. Por gjithashtu nuk ka pasur kurrë një titull që i përkiste Benzemas, një garë që ai e përcaktoi në një mënyrë që do të thoshte se do të lidhej gjithmonë me të. Do të ishte një trofe për ta ngritur atë dhe për ta vendosur në mesin e më të mirëve.
Në moshën 35-vjeçare, Benzema kërkon të fitojë trofeun e tij të pestë në Ligën e Kampionëve në tetë vjet, për të shkuar me katër titujt e tij në La Liga, dy Kupat e Spanjës, katër Kupat e Botërorit të klubeve dhe tri Superkupat Evropiane. Këtë sezon, ai gjithashtu fitoi trofeun “Pichichi”, pasi përfundoi si golashënuesi më i mirë i La Ligës. Megjithatë, pavarësisht nga të gjitha gjërat që zotëron Benzema, lavdërimet e fituara ose të humbura dhe arritjet e tij të konsiderueshme deri më tani, kjo finale e Ligës së Kampionëve është diçka tjetër. Do të ishte një trofe që do t'i përkiste Real Madridit, por më shumë se kujtdo tjetër, një triumf që do t'i takonte atij.
