Një nga klubet e vetme që zyrtarisht nuk ka reaguar rreth Superligës Evropiane, Barcelona, përmes një komunikate në faqen zyrtare ka thënë se një çështje e tillë do analizë më të thellë, duke lënë të kuptohet se vazhdon të mbetet pro kësaj nisme.
Barcelona në reagimin e saj ka thënë se futbolli evropian ka nevojë për reforma strukturore për t’iu garantuar klubeve qëndrueshmëri financiare.
“FC Barcelona ndan pikëpamjen e shumicës së klubeve më të mëdha evropiane të futbollit, dhe madje edhe më shumë duke pasur parasysh klimën aktuale socio-ekonomike, se ka nevojë për reforma strukturore për të garantuar qëndrueshmërinë financiare dhe realizueshmërinë e futbollit botëror duke përmirësuar produktin që i ofrohet tifozëve në të gjithë botën dhe duke konsoliduar dhe madje duke rritur bazën e tifozëve mbi të cilën mbështetet ky sport, i cili është themeli i tij dhe forca më e madhe”.
“Në këtë kontekst, Bordi i drejtorëve të FC Barcelonës pranoi, si urgjente të menjëhershme, ofertën për t’u bërë pjesë, si anëtare themeluese e Superligës, një garë e krijuar për të përmirësuar cilësinë dhe atraktivitetin e futbollit për tifozët dhe, në të njëjtën kohë, si një nga parimet më të patjetërsueshme të klubit, të kërkojnë formula të reja për solidaritet me familjen e futbollit në tërësi. Në çdo rast, FC Barcelona, si një klub që gjithmonë ka qenë dhe gjithmonë do të jetë në pronësi të secilit prej anëtarëve të saj, një vendim të tillë e paraqiti për miratim në organet e saj kompentente, pas një studimit të kujdesshëm”.
“Duke pasur parasysh reagimin publik që projekti i lartpërmendur ka gjeneruar në shumë dhe shumë sfera të ndryshme, nuk ka dyshim që FC Barcelona vlerëson se kërkohet një analizë shumë më e thellë e arsyeve që e kanë shkaktuar këtë reagim për të rishikuar, nëse është e nevojshme, dhe në masën e kërkuar, propozimi siç është formuluar dhe zgjidhur fillimisht të gjitha ato çështje, gjithmonë për të mirën e interesit të përgjithshëm të botës së futbollit. Një analizë e tillë e thelluar kërkon kohë dhe qetësi të nevojshme për të shmangur ndërmarrjen e ndonjë veprimi të nxituar”.
Në komunikatë, Barcelona nënvizoi faktin se një Gjykatë e Drejtësisë u ka dhënë të drejtë klubeve për formimin e Superligës Evropiane.
“Ne mendojmë se është po aq e rëndësishme të nënvizojmë faktin objektiv që një Gjykatë e Drejtësisë tashmë ka dhënë mbrojtje urgjente ligjore siç kërkohet, duke konfirmuar kështu të drejtën e iniciativës nga ana e klubeve themeluese të projektit të Superligës. Në lidhje me këtë, FC Barcelona konsideron se do të ishte e papërshtatshme që procesi i nevojshëm i reflektimit dhe debatit të vendoset nën kriteret e presionit dhe kërcënimit të pajustifikuar. Pavarësisht se është plotësisht e vetëdijshme për rëndësinë dhe interesin e ngritur nga kjo çështje, si dhe nevojën për të vepruar gjithmonë me transparencën më të madhe, FC Barcelona do të veprojë në çdo kohë me maturinë e duhur dhe kërkon mirëkuptimin, respektin dhe mbi të gjitha durimin e duhur midis mbështetësve të FC Barcelona dhe opinionit publik në përgjithësi”, thuhet në komunikatën e klubit katalanas.
Projekti i formimit të Superligës Evropiane është pezulluar pasi gjashtë klubet angleze vendosen të tërhiqeshin nga kjo ide, pas presionit të madh nga UEFA e tifozëve të klubeve përkatëse.
