Barcelona ka shkëlqyer në ndeshjen ku i është bërë nder legjendës së futbollit, Diego Armando Maradona, që ka vdekur të mërkurën. Seria e golave e Martin Braithwaite ka vazhduar, ndërsa kanë realizuar edhe Antoine Griezmann, Philippe Coutinho e Lionel Messi.
Barcelona të dielën e mposhti Osasunan me shifrat 4:0, në kuadër të xhiros së 11-të të La Ligas. Por mbetet larg pozitës së dëshiruar në tabelë. Është e shtata me 14 pikë, kurse ka dy ndeshje më pak të luajtura.
Ndeshja nisi me një minutë heshtje në nderim të ikonës argjentinase, Maradona. Ndërkohë superylli Messi u kujdes për të nderuar edhe më shumë Maradonën.
Ai shfaqi fanellën e Maradonës te skuadra Newell Old Boys gjatë festës së golit. Goli i Messit madje është krahasuar me një gol që Maradona e kishte shënuar në vitin 1993 në një ndeshje për Newellin.
Ishte 7 shtatori i vitit 1993 kur Diego Armando Maradona bëri rikthimin e tij në futbollin argjentinas, duke veshur fanellën e Newellit në një miqësore ndaj skuadrës nga Ekuadori, Emelec. Maradona kishte shënuar në fitore, ndërsa nga tribunat dëshmitar i atij momenti historik kishte qenë Lionel Messi, superylli aktual i futbollit.
“Nuk kujtoj shumë, isha shumë i ri, por e kam parë Maradonën në fushë, në ditën kur ai debutoi ndaj Emelec”, kishte thënë Messi.
Edhe
Messi: Fitorja ndaj Anglisë, dhuratë për Maradonën
Të dielën Messi ka publikuar një fotografi të tij përkrah fotografisë së Maradonës. Të dy mbanin duart lart në fotografi.
“Ishte gjë e madhe në secilin kuptim”, ka thënë trajneri i Barcelonës, Ronald Koeman, për golin dhe festën e veçantë të Messit.
“Këto janë gjëra të një lojtari të madh, së pari për lojën e golin e më pas për veprimin e jashtëzakonshëm për Maradonën. Nuk e kam ditur se Messi do të veprojë ashtu”, ka theksuar Koeman.
