Aston Villa ka shënuar një tjetër fitore në Premier League të Anglisë. Të dielën, Aston Villa mposhti në udhëtim Brentfordin me rezultatin 2:1, në ndeshjen që i takoi javës së 17-të të elitës së futbollit anglez. Për Aston Villan është fitorja e 12-të. Nga 17 ndeshje ka fituar 38 pikë, kurse Brentfordi i ka 19 pikë.
Ekipi i drejtuar nga Unai Emery e fitoi me përmbysje ndeshjen. Keane Lewis-Potter shënoi golin e epërsisë në minutën e fundit të pjesës së parë, ndërsa dy golat e fitores, Aston Villa i shënoi në pjesën e dytë. Alex Moreno barazoi rezultatin në minutën e 77-të, kurse për 2:1 shënoi Ollie Watkins në minutën e 85-të.
Ben Mee në minutën e 71-të dhe Boubacar Kamara në minutën e 97-të u ndëshkuan me karton të kuq.
