Trajneri i Arsenalit, Mikel Arteta, sërish ka fajësuar gjyqtarët për humbjen e skuadrës së tij në Premier League.
Arsenali u mposht të shtunën mbrëma 1:0 nga Aston Villa në “Villa Park”. “Topçinjtë” janë zhvendosur në pozitën e dytë në tabelë, një pikë më pak se Liverpooli lider, 36 respektivisht 37. Aston Villa pozicionohet e treta me 35 pikë.
Arteta, i cili u detyrua ta shikonte ndeshjen nga tribunat pas dënimit që mori pas humbjes nga Newcastle muajin e kaluar, i pyetur nëse ndërhyrja e Douglas Luizit në Gabriel Jesusin dhe goli i anuluar i Kai Havertzit në fund pas rishikimit të VAR-it ishin gabime të gjyqtarit, ai u përgjigj: “Ishin të qarta dhe të dukshme”. Megjithatë, ai asnjëherë nuk ka specifikuar se kujt po i drejtohet, pavarësisht këmbënguljes së gazetarëve.
“E qartë dhe e dukshme. Ky është mendimi im, kjo është e gjitha që mund të them. Mund vetëm ta përsëris: E qartë dhe e dukshme”, ka thënë Arteta pas ndeshjes e cila u vendos nga goli i John McGinnit në minutën e shtatë.
I pyetur më tej nëse donte të thoshte qartësisht se kujt po i drejtohej, ai u përgjigj: “Jo, jo, qartë dhe dukshëm”.
I pyetur përsëri se çfarë donte të thoshte me këtë, trajneri i Arsenalit u shpreh: “E qartë dhe e dukshme, kjo është ajo që dua të them”.
Edhe
Arteta thotë se Arsenali po kalon periudhë të vështirë
Më vonë në konferencën e tij për shtyp, Artetas iu kërkua sërish të sqaronte se cili ishte saktësisht qëndrimi i tij për vendimet e gjyqtarit dhe u përgjigj: “Nuk do të flas më për këtë, më falni”.
