Milani duket se këtë sezon do të luftojë për një vend në top-katërshe, pasi çështja e titullit duket shumë larg.
Të shtunën mbrëma, në “San Siro”, Milani barazoi 2:2 me Bolognan.
Rossonerët madje gabuan dy herë nga penalltia.
Joshua Zirkzee, 22-vjeçari në formë, kaloi mysafirët në epërsi në minutën e 29-të.
Olivier Giroud (42’) dështoi nga penalltia për ta barazuar rezultatin. Por tre minuta më vonë, Ruben Loftus-Cheek (45’) arriti të shënonte.
Në pjesën e dytë, Theo Hernandez (74’) dështoi nga pika e bardhë për t’i dhënë epërsinë Milanit. Këtë e bëri në minutën e 83-të sërish Loftus-Cheek.
Por penalltitë e humbura i kushtuan në fund skuadrës së Stefano Piolit. Pikërisht nga penalltia, skuadra e Bolognas e barazoi rezultatin në minutën e dytë të shtesës përmes Roberto Orsolinit.
Milani është në vendin e tretë me 46 pikë. Ka shtatë pikë më pak se Juventusi lider dhe pesë më pak se Interi i vendit të dytë, por që ka dy ndeshje më pak.
Bologna është e shtata me 33 pikë.