Skuadra e Arsenalit nuk ka hequr dorë nga transferimi i mesfushorit Douglas Luiz, raporton “The Sun” të martën. Mësohet se Arsenali është gati të ofrojë 60 milionë euro për brazilianin, i cili është pjesë e skuadrës së Aston Villas.
25-vjeçari pëlqehet shumë nga trajneri Mikel Arteta, i cili tentoi transferimin e tij edhe gjatë verës, por që Aston Villa refuzoi ofertën. Luiz është pjesë e Aston Villas prej vitit 2019, ndërsa këtë edicion ka 6 gola e 3 asistime në 20 paraqitje në të gjitha garat.
Ai ka kontratë me Aston Villan deri në vitin 2026, ndërsa karrierë në Evropë ka bërë edhe te Manchester City e Girona. Tek Arsenali po shpresojnë ta sigurojnë Luizin në afatin kalimtar të janarit, pasi klubi londinez do ta shesë ganezin Thomas Partey, të cilit tashmë i ka caktuar çmimin.
