Për ndeshjet e para në shtëpi në Ligën e Kampionëve pas më shumë se 20 vjetësh, Newcastle Unitedi dhe Lensi do të kenë atmosferë në stadiumet e tyre të zhurmshme këtë javë.
Union Berlin bën debutimin në Ligën e Kampionëve në stadiumin olimpik, të huazuar prej Herthas, me 75 mijë ulëse, i cili do të jetë shtëpi për një ekip që luajti në kategorinë e tretë gjermane deri në vitin 2010.
Newcastle, Lensi dhe Unioni nuk ishin pranë debatit kur Superliga Evropiane u iniciua dhe dështoi në vitin 2021, nga pronarët e klubeve që e morën si të mirëqenë Ligën e Kampionëve dhe dëshironin pasuri shtesë dhe kontrollin e ligës. Pikërisht dy vjet më parë, Newcastle ishte ende në një ecuri pa fitore dhe në zonën e rënies në Premier League.
Liga e Kampionëve i mbijetoi kërcënimit të Superligës dhe tani përfshin ekipe që munguan gjatë dhe ekip debutues, që u kualifikuan me meritë - i katërti në Premier League, nënkampioni në Ligue 1 dhe i katërti në Bundesligë.
Newcastle do t'i tregojë Kylian Mbappet dhe Paris Saint-Germainit të mërkurën atmosferën që krijojnë tifozët brenda stadiumit prej 52 mijë ulësesh, “St. James' Park”.
Lens mirëpret Arsenalin të martën në “Stade Bollaert-Delelis” ku kapaciteti prej 38,000 ulësesh është më i madh se popullsia e qytetit. Unioni po përdor Stadiumin Olimpik – i cili priti finalen e Ligës së Kampionëve 2015 – sepse stadiumi i tij është shumë i vogël për ndeshjet në shtëpi të Grupit C, duke filluar të martën ndaj Bragas.
“Një Ligë e Kampionëve për të gjithë unionistët”, tha presidenti i klubit nga Bundesliga, Dirk Zingler.
“Ne u udhëhoqëm nga kjo ide dhe do të përpiqemi të sigurojmë që sa më shumë njerëz të mund të përballojnë edhe këto ndeshje”.
Lëvizja e përkohshme e çon klubin nga ish-Gjermania Lindore në perëndim të Berlinit, dikur të ndarë. Napoli dhe Real Madridi do të vizitojnë më vonë Berlinin, por që fillimisht do të përballen të martën mbrëma në “Stadio Diego Armando Maradona”.
Royal Antwerpi i Belgjikës ka më shumë se 60 vjet që ka pritur të luajë ndeshje të elitës evropiane në shtëpinë e tij. Antwerpi përballet me Shakhtar Donetskun të mërkurën në stadiumin “Bosuil” në vendin ku klubi ka luajtur që nga viti 1923. Kishte 45,000 tifozë në këtë stadium në tetor të vitit 1957 kur kampioni në fuqi, Real Madrid fitoi 2:1 në ndeshjen e parë të rundit të parë të Kupës Evropiane. Pritja e Antwerpit për një ndeshje të radhës në shtëpi përfundoi në muajin gusht, në plejofin kualifikues. Pak më shumë se 13,000 tifozë ishin në tribuna për ta parë fitoren e Antwerpit 1:0 ndaj AEK-ut të Athinës. “Bosuil” nuk është stadiumi më i vjetër në Champions këtë javë. Manchester Unitedi pret Galatasarayn të martën në “Old Trafford”, ku u transferua 113 vjet më parë.
Celticu luan ndaj Lazios të mërkurën në stadiumin “Parkhead”, ku kampioni skocez luan prej 131 vjetësh, që nga viti 1892.
© KOHA. Të gjitha të drejtat janë të rezervuara.
