Dinamo u bën thirrje tifozëve që të mos udhëtojnë për në Prishtinë

Ballkani nuk ka ndarë bileta për tifozët e Dinamo Zagrebit për ndeshjen e së enjtes, që i takon fazës grupore të Ligës së Konferencës. Kampioni i Kosovës në futboll ka vepruar në bazë të vendimit të UEFA-s të 19 gushtit, me të cilin tifozëve të kampionit kroat u ndalohet paraqitja në ndeshjet evropiane në udhëtim. Kjo masë e UEFA-s erdhi pas incidenteve të rënda që ndodhën në Athinë para ndeshjes së AEK-ut me Dinamon. Një tifoz grek mbeti i vdekur nga përleshjet e tifozëve, ndërsa shumë tifozë kroatë të Dinamo Zagrebit u burgosën nga autoritetet greke. Ndeshja ishte shtyrë dhe ishte zhvilluar më vonë.

Për të zvogëluar mundësinë e incidenteve të tjera, UEFA vendosi që të mos lejojë tifozët e Dinamos në ndeshjet e tjera evropiane në udhëtim, të paktën deri në fund të këtij edicioni të garave.

Ndonëse vendimi i UEFA-s është në fuqi, Dinamo të hënën përmes një postimi, ka kërkuar nga tifozët e saj që mos të udhëtojnë për në Prishtinë, ku luhet ndeshja me Ballkanin. UEFA ka shkruar se i takon Dinamos dhe kundërshtarëve të kësaj skuadre, në këtë rast Ballkanit, që të bëjnë maksimumin për të parandaluar udhëtimin e tifozëve të klubit zagrebas.

“Tifozëve mysafirë do t’u ndalohet qasja në stadiumin ‘Fadil Vokrri’ për ndeshjen në fjalë dhe masat e posaçme të sigurisë, përfshijnë: Në hyrje të stadiumit do të ketë kontroll të kartave të identitetit; personat me dokumente kroate nuk do të lejohen të hyjnë në stadium; personave të cilëve u ndalohet hyrja në stadium nuk do t’u kthehen paratë për biletat e blera”, ka shkruar Dinamo të hënën në faqen zyrtare.

“Për këtë arsye u bëjmë kërkesë dhe apel tifozëve të Dinamos që të respektojnë rregullat, të respektojnë vendimin e marrë dhe mos të udhëtojnë për në kryeqytetin e Kosovës, Prishtinë. Klubi thekson angazhimin për një mjedis të sigurt dhe pozitiv dhe falënderon gjithë tifozët për mirëkuptimin dhe mbështetjen e tyre”, ka shkruar tutje Dinamo.

Tifozët e Dinamos janë të njohur si “Bad Blue Boys”. Ky tifo-grup është goxha i njohur në Evropë edhe për incidentet e shkaktuara. “Bad Blue Boys” ka qëndrim pozitiv ndaj shqiptarëve. Kjo ishte vërtetuar vjet gjatë një ndeshje me Shkupin, ku kishin bërë tifo në koordinim me tifo-grupin shqiptar “Shvercerat”. “BBB” e “Shvercerat” kishin bërë thirrje anti-serbe.

Ardhja e Dinamos, klubit me shumë përkrahës shqiptarë, po pritet me interesim në Kosovë. Ndeshja Ballkani – Dinamo zhvillohet të enjten nga ora 18:45 dhe i takon Grupit C të Ligës së Konferencës.

Në ndeshjen e parë në grup, Dinamo fitoi 5:1 ndaj Astanas, ndërsa Ballkani pësoi 1:0 nga Viktoria Plzeni. Dinamo, që ka përvojë të gjatë në fazën grupore të Ligës së Kampionëve dhe Ligës së Evropës, vlerësohet favorit i madh ndaj Ballkanit.