Nga portieri i vitit në mbetjen jashtë për një vit. Nga elita në ikje, nga numri një te ndalimi për drogë, nga i kërkuari te lirimi pa pagesë. Dhe sërish i pandalshëm.
Andre Onana po tenton t’i arrijë majat e sportit dhe të bëhet kampion evropian, 855 ditë pasi u ndalua për herë të parë për doping. Është një udhëtim që shumë njerëz do t'i bënte të tërhiqen nga sfida ose do t’i dëmtonte mentalisht. Megjithatë pengesat duken pjesë përbërëse e karrierës së kamerunasit.
Historia e Onanas është një rrëfim për ngritje, rënie, ngritje. Dhe e gjithë kjo para se ai të përpiqet të ndalojë Erling Haalandin dhe bashkëlojtarët e tij të Cityt.
Ai u përball me muaj të shumtë të kaluar duke mos u lejuar të stërvitej apo të luante me Ajaxin. Dhe nuk ishte hera e parë që Onana po përjetonte një fat të tillë. Pasi u bashkua me klubin e parë në Evropë, Barcelonën, Onana ishte një nga grupi i të rinjve që nuk mund të luanin, pasi u zbulua se klubi spanjoll kishte shkelur ligjet e rekrutimit. Kjo bëri që ai të ndalohej të luante për Barcelonën në mënyrë efektive në moshën 18 vjeçe. Pritja ndikoi shumë, kurse përpara kishte gjermanin Marc-Andre ter Stegen. I duhej të largohej me shpresë për të luajtur në nivel të lartë.
“Eredivisie” u shfaq në horizont dhe Onana nënshkroi për Ajaxin në vitin 2015, kur ishte ende adoleshent. Pas një edicioni e gjysmë me ekipin e dytë, ai u inkuadrua direkt në ekipin e parë dhe mezi humbi një ndeshje për katër vjet e gjysmë. Pavarësisht se nuk nënshkroi për Interin deri në këtë edicion (2022/23), edicioni i fundit i plotë i Onanas për Ajaxin ishte 2018/19. Edicionin pasues elita holandeze u ndërpre herët për shkak të pandemisë, ndërsa edicioni 2020/21 e pa atë të goditet nga një ndalim i dopingut nga UEFA për gëlltitjen aksidentale të tabletave të gruas së tij, të cilat përmbanin një substancë të ndaluar. Ndalimi fillimisht ishte 12 muaj, u ul në nëntë, por kjo do të thoshte se ai humbi pjesën tjetër të atij edicioni dhe pjesën më të madhe të edicionit pasues, duke u shfaqur vetëm në gjashtë ndeshje të ligës në kampanjën 2021/22. Përkundër kësaj, ai e fitoi titullin dhe kupën e Holandës si dhe arriti në finalen e Ligës së Evropës përpara se gjërat të rifillonin edhe një herë. Ishte një rikthim i ri, një përpjekje e re për të ngjitur majat për Onanan.
“Nuk mund të them asgjë përveçse të falënderoj Simone Inzaghin që ma dha mundësinë të luaj për Interin. Të jesh këtu është një burim krenarie për mua dhe shpresoj se ne mund të vazhdojmë dhe të fitojmë gjithçka”, tha Onana përpara finales së Ligës së Kampionëve.
Interi sigurisht që mbështetet tek ai, te njeriu që më në fund do të marrë dorëzat nga Samir Handanoviqi, në dukje i përjetshëm.
“Ka pasur momente të mrekullueshme dhe veçanërisht të vështira në karrierën time. Si për shembull të stërvitem vetëm përpara se të kthehesha në klub”, tha Onana.
Onana stërviti i vetëm dhe këtë e bëri në mënyrë efektive, duke marrë një mini-ekip me vete në Spanjë për ta mbajtur formën për muaj të tërë dhe duke u përgatitur për kthim. E gjithë kjo iu shpagua me një kalim në Itali dhe ecuria e Interit në Evropë ofron një mundësi të dytë drejt lavdisë kontinentale.
Portieri e pranon se gabimi me ilaçin e gruas ishte përgjegjësi e tij. Onana nuk kishte ndërmend të mashtronte. Tableta që mori nuk ofronte asnjë avantazh sportiv dhe pranoi në shpjegimin e tij se “gabimi njerëzor” në fund të fundit nuk ka rëndësi kur “ju jeni përgjegjës për gjithçka që keni në trup”.
Ky rast do të kishte çuar në mungesën e Onanas në Kupën e Kombeve të Afrikës nëse dënimi nuk do të ishte ulur. Dhjetë muaj më vonë ai humbi Kupën e Botës pas një konfrontimi më të drejtpërdrejtë. Kishte një mosmarrëveshje me trajnerin e Kamerunit, Rigobert Song dhe u përjashtua nga skuadra. Pasi Kameruni luajti ndeshjen e parë, Onana e Song debatuan për taktikat dhe portieri më pas u tërhoq nga detyra ndërkombëtare. Ka vetëm 34 ndeshje me përfaqësuese.
Onana tashmë ka një rekord. U bë portieri i parë i Interit që nuk ka pranuar gola në shtatë ndeshje të Championsit brenda një edicioni. Ai ka fituar dy trofe me Interin, Kupën dhe Superkupën e Italisë dhe është në kërkim të trofeut të tretë dhe më të rëndësishëm në futbollin evropian.
“Nuk kemi çfarë të humbin. Rivalët kanë presion më të madh se ne. Jemi përgatitur mirë, nuk kemi aspak stres dhe jemi gati të përballemi me një kundërshtar shumë të fortë. Është ndeshje speciale për ne pasi finalja e Ligës së Kampionëve mund të vijë një herë në jetë”, tha Onana.
© KOHA. Të gjitha të drejtat janë të rezervuara.
