Legjenda e Real Madridit thotë se Spanja humbi qëllimisht
FOTO: AP
Spanja u mposht nga Japonia në mënyrë që t’i shmanget Brazilit në çerekfinale, ka thënë legjenda e Meksikës në Kupën e Botës, Hugo Sanchez.
Ish-futbollisti i Real Madridit që ka zhvilluar tri Kupa të Botës për Meksikën, është pyetur nga një prezantues i mediumit “ESPN” në lidhje me këtë çështje.
“Ju siguroj. Nuk isha atje dhe nuk jam në mendjen e Luis Enriques, por ai ka menduar se cila është mënyra më e mirë për t’iu shmangur Brazilit në çerekfinale. Po, është e rrezikshme, por është një rrezik që ia vlen. Nuk është se Spanja i frikësohet Brazilit, por e respekton”, ka thënë Hugo Sanchez, shkruan “AS” të premten.
Në fazën e 1/8 së finales në Botëror, Spanja do të luajë kundër Marokut.
