5 perditesime
14:57

Prishtina merr fitoren e dytë rresht në Superligë

Prishtina e ka shënuar edhe fitoren e dytë rresht në elitën e futbollit të Kosovës.

“Bardhekaltrit” e Prishtinës të shtunën gjatë ditës fituan në udhëtim te Ulpiana me rezultatin 3:0. Në fitore, me dy gola të shënuar kontribuoi Leotrim Kryeziu, derisa Besnik Krasniqi e shënoi një tjetër. Kryeziu e hapi serinë e golave në minutën e 34-rt.

Në pjesën e dytë nga penalltia realizoi Krasniqi në minutën e 57-të, kurse Kryeziu me golin e dytë personal në ndeshje vulosi çështjen e fituesit. Me këtë fitore, Prishtina në vendin e katërt ka 24 pikë aq sa ka edhe Llapi i vendit të pestë.

Ulpiana mbetet në vendin e shtatë me 17 pikë, një më shumë se Dukagjini i vendit të tetë.

Në takimin e parafundit të stinorit vjeshtor, Prishtina në stadiumin “Fadil Vokrri” në kryeqytet e luan derbin ndaj Dritës, kurse Ulpiana e pret Feronikelin.

14:54

Marclei Santos ndëshkohet me të kuq

Ulpiana ka mbetur me një futbollist më pak në fushë në duelin kundër Prishtinës.

Sulmuesi dhe kapiteni i skuadrës së lipjanasve, Marclei Santos, u ndëshkua direkt me karton të kuq pas ndërhyrjes në Leotrim Bekteshin në minutën e katërt të kohës shtesë. Kartoni i kuq u dha pas shikimit të sistemit VAR.

14:46

Tjetër gol i Prishtinës

Leotrim Kryeziu e ka trefishuar rezultatin e Prishtinës në udhëtim te Ulpiana.

Kryeziu golin e dytë personal në ndeshje e realizoi në minutën e 85-të me gjuajtje të saktë me të majtën nga distanca.

 

14:18

Prishtina dyfishon epërsinë

Prishtina e ka dyfishuar rezultatin në udhëtimin tek Ulpiana në kuadër të xhiros së 16-të të Superligës.

Ardian Musliu ndërhyri në Leonit Abazin në minutën e 56-të brenda në zonë dhe gjyqtari kryesor Bardh Ajeti, sinjalizoi në pikën e bardhë për shkak të ndërhyrjes së palejuar.

Besnik Krasniqi ishte i saktë me golin e shtatë të sezonit, gjashtë prej tyre nga penalltia. I saktë ishte edhe në stadiumin “Sami Kelmendi” në Lipjan në minutën e 57-të.

13:51

Prishtina në epërsi pas pjesës së parë

Prishtina ka shkuar në pushimin mes pjesëve me rezultatin minimal, 1:0.

Golin e vetëm në 45 minutat e para të takimit e shënoi Leotrim Kryeziu në minutën e 34-rt. Kryeziu shënoi pas asistimit të Gauthier Mankendas.

Kjo ndeshje i takon xhiros së 16-të në Superligën e Kosovës në futboll. Tri ndeshje tjera do të luhen të dielën, Malisheva-Drenica, Feronikeli-Ballkani dhe Llapi-Gjilani. Drita-Dukagjini që luhet të hënën e mbyll xhiron e 16-të të Superligës.

13:40

Prishtina në avantazh ndaj Ulpianës

Prishtina ka kaluar në avantazh kundër Ulpianës në Lipjan.

Ndeshja e vetme e xhiros së 16-të në elitën e futbollit të Kosovës po zhvillohet në stadiumin “Sami Kelmendi” në Lipjan.

Prishtina po udhëheq në udhëtim ndaj Ulpianës me golin e shënuar nga sulmuesi Leotrim Kryeziu.

Ai shënoi në portën e Drilon Ajetit me gjuajtje të saktë nga afërsia në minutën e 34-rt, pas asistimit që mori nga e djathta prej sulmuesit të krahut, Gauthier Mankenda.