Sport

Dani Alves i ribashkohet Brazilit për kualifikimet e Botërorit

 

Përzgjedhësi i Përfaqësueses së Brazilit, Tite ka rikthyer në ekip mbrojtësin e krahut të djathtë, 38-vjeçarin Dani Alves. Tite të premten e publikoi listën e futbollistëve, në të cilët llogarit për ndeshjet kualifikuese të Kampionatit Botëror “Katari 2022”. Brazili më 4 qershor do të përballet me Ekuadorin kurse katër ditë më vonë, do të luajë edhe kundër Paraguait. Për Alvesin, kjo do të jetë paraqitja e parë ndërkombëtare që nga muaji tetor i vitit 2019. Atëbotë, Alves që është pjesë e Sao Paulos, u shpall lojtari më i mirë i turneut Copa America, në të cilin triumfoi Brazili.

Tite ka thënë shkurt se ka besim të madh në Alvesin dhe kur e ka përpiluar listën për dy ndeshjet eliminatore, nuk e ka shikuar moshën, por paraqitjet e tij të mira. Alves këtë edicion ka shënuar një gol dhe ka bërë katër asistime në 11 ndeshje për Sao Paulon, ekip te i cili e mbanë shiritin e kapitenit.