4 perditesime
17:15

Laura Fazliu e pesta në Evropë

Xhudistja Laura Fazliu nuk ka arritur të fitoj medalje në Evropianin për seniorë që po mbahet në Lisbonë të Portugalisë. Laura është mposhtur në luftë për medalje të bronztë nga holandezja e nivelit të lartë, Sanne Vermeer. Vermeer fitoi shpejtë, duke e zënë në pozitë të papërshtatshme xhudisten kosovare.

Laura përfundoi në vendin e pestë në kategorinë deri 63 kilogramë, që megjithatë është sukses i madh për xhudisten e re. Ajo ende po merr përvojë në nivelin senior. Vendi i pestë në Evropian është dukshëm suksesi më i madh i saj te senioret deri më tani.

Laura gjatë ditës kishte tri fitore e dy humbje.

Laura Fazliu nuk ishte në mesin e bartëseve në kategorinë deri 63 kilogramë. Ndërkohë holandezja Sanne Vermeer ishte bartësja e katërt. Ajo është e 11-ta në ranglistën botërore. Laura është e 50-ta në ranglistë. 20-vjeçarja ka tri medalje evropiane në kategori të reja. Prej Vermeerit kishte humbur edhe në vitin 2017 në Evropianin e juniorëve në Maribor.

15:05

Laura Fazliu një fitore larg medaljes evropiane

Laura Fazliu e ka fituar luftën e parë në repesazh, në Evropianin e xhudos në Lisbonë. Në kategorinë deri 63 kilogramë, Laura e mposhti italianen Maria Cnetracchio, medalisten e bronztë evropiane nga viti 2019.

Laura e kontrolloi luftën që megjithatë shkoi në kohën shtesë. Italiania mori tri dënime dhe Laura kështu siguroi luftën për të bronztën.

Do të përballet me holandezen Sanne Vermeer. Deri më tani Laura ka tri fitore e një humbje.

14:20

Laura ndalet në çerekfinale, vazhdon në repesazh

Laura Fazliu ka shfaqur nivel të lartë, por megjithatë është ndalur në çerekfinale të Evropianit në Lisbonë. Në kategorinë deri 63 kg, Laura humbi nga rusja Daria Davydova.

Davydova realizoi hedhje të dyshimtë në kohën shtesë.

Tani Laura kërkon medaljen e bronztë përmes repesazhit.

13:20

Laura me fitore të madhe, mposht medalisten botërore

Laura Fazliu ka shënuar njërën prej fitoreve më të mëdha në karrierë. Në rrethin e dytë të Evropianit të xhudos, Fazliu e mposhti holandezen Juul Franssen, fituesen në fuqi të medaljes së bronztë botërore. Franssen ka dy medalje botërore e një medalje evropiane, nga viti i kaluar.

Fazliu realizoi hedhje për Waza-Ari që i mjaftoi për fitore dhe avancimin tutje në kategorinë deri 63 kilogramë.

12:04

“Ippon” në nismë për Laura Fazliun

Xhudistja Laura Fazliu e ka nisur me sukses Evropianin që po mbahet në Lisbonë. Në kuadër të xhiros së parë të kategorisë deri 63 kilogramë, Fazliu e mposhti gjermanen Dena Pohl.

Fazliu realizoi “Ippon” për më pak se dy minuta. Në xhiron e dytë ajo takohet me holandezen Juul Franseen.

Dje në Evropian, Distria Krasniqi fitoi medalje të artë e Nora Gjakova të bronztë.