Bebja e lumtur, kobra, luftëtari paqësor e qenushi i entuziazmuar, janë vetëm disa nga pozitat që një grup fëmijësh po i praktikojnë.

Ora e jogës i ka bërë bashkë për të relaksuar mendjen dhe trupin, ani pse janë ende të vegjël në moshë.

Periudhat e vështira pandemike shërbyen që prindërit të marrin kthesa për përfshirjen e fëmijëve në praktika të ngritjes mendore, emocionale e fizike të të vegjëlve të tyre.

Nil Domi është njëri nga pjesëmarrësit e klasës, i cili thotë se praktikimi i kësaj disipline i ka ndihmuar në shumë aspekte.

10-vjecari përmend stresin e testimit në shkolla, të cilin nuk e ndien më.

“Me joga kam filluar qe tri javë dhe mami më ka propozuar që të vij këtu. Arsyeja që kam ardhur është për t’u relaksuar, për të larguar stresin, për të bërë ushtrime, të mos kem ndërprerje të gjumit. Kam vërejtur shumë ndryshime, sepse kur kam teste në shkollë nuk kam më stres e as probleme të gjumit. Unë do t’ua propozoja fëmijëve të vijnë këtu, sepse ndihesh mirë e i relaksuar, nuk të ndërpritet gjumi gjatë natës dhe të ndihmon të menaxhosh stresin”, ka thwnw Nil Domi.

Bashkëmoshatar i Nilit është edhe Rron Llalloshi.

Arsyeja për të cilën Rroni filloi shkencën e qenies së brendshme ka të bëjë me problemet shëndetësore fizike të tij.

“Kam filluar të merrem me joga qe tri javë dhe më ka sugjeruar mami, sepse më ka thënë se është shumë e mirë për shpinë dhe qafë. Pozitat më të preferuara të miat janë ushtrimet e qafës dhe shpinës. Para se me fillu jogën nuk kam pasur gjumë të plotë, kam pasur dhimbje të kurrizit e qafës, ndërkohë që tash nuk i kam më. Do t’ua sugjeroja shokëve të vijnë, sepse gjejnë ndihmë për dhimbjet e trupit apo edhe probleme të tjera”, wshtw shprehur Llalloshi.

Trajnerja e Studio AbbeYoga, Arbëresha Maloku, është shoqëruesja e fëmijëve për 60 minutat e tyre të qetësisë. Ajo rrëfen për grupmoshat më të frekuentuara që ka në studio.

“Studio ka një vit e gjysmë që është hapur, në kohë të pandemisë. Duke e parë kërkesën për praktikimin e jogës te fëmijët e kam hapur edhe këtë studio. Ka grupmosha të ndryshme, të ndara sipas niveleve. Tani punojmë me fëmijë gjashtë vjeç e më lart. Ka grupe fillestarë, të rritur, adoleshentë e të tillë. Mosha ka prej 3 - 6, deri te seniorët. Ka rini, moshë mesatare dhe mbi 60 vjeç”, tha Maloku.

Ushtrimi i disiplinës indiane fillimisht ishte e paraparë vetëm për të rritur, mirëpo pandemia u shërbeu për të mirë edhe fëmijëve të cilët krahas prindërve mbanin seanca online.

“Para nëntë vjetësh kam filluar të merrem me joga. Gjatë kohës që praktikonim me të rriturit në pandemi e kam parë tendencën e fëmijëve që të rrinin afër prindërve kur ushtronin. Kemi pasë dëshirë me e hap më herët, por pandemia pati ndikimin e vet, megjithatë jam e lumtur që u koordinuam edhe me prindër për orare. Fillimisht punuam një herë në javë, ndërkohë që tash vazhdojmë dy herë në javë”, shtoi ajo.

Maloku thotë se sot fëmijët që nga moshat e hershme dëshirojnë të dinë si të menaxhojnë frikën, stresin, hiperaktivitetin apo mungesën e energjisë. E këto janë disa nga përfitimet që ata kanë kur kalojnë kohë në studio.

Kur diçka e re i shtohet rutinës së fëmijëve, merr kohë derisa ata të mësohen. Trajnerja thotë se fëmijët ishin të njohur me konceptin e ushtrimeve nga prindërit, andaj edhe ka qenë më e lehtë të adaptohen.

“Fatmirësisht ky grup ka qenë i gatshëm për joga. Klasën e parë kam pasur djem të vegjël e që më ka pëlqyer ky fakt. Janë shumë të vëmendshëm dhe më dëgjojnë për çdo rregull që ua tregoj. Janë shumë entuziast edhe fëmijët, edhe prindërit. Prindërit janë falënderues, kanë parë efekt te fëmijët e tyre, andaj janë shumë të kënaqur. Më tregojnë gjithmonë për problemet që joga ua ka zgjidhur atyre dhe fëmijëve”, u shpreh ajo.

Maloku ua rekomandon prindërve të fillojnë për vete ushtrimin e disiplinës, që edhe fëmijët të frymëzohen nga ta.

Gjatë dy vjetëve të fundit, trajnerja tregon se studioja ka bashkëpunuar me çerdhe, organizata joqeveritare, Komunën e Prishtinës dhe prindër për t’i njohur ata me përfitimet që sjell joga.