Juria nuk arrin vendim unanim për të gjitha akuzat ndaj Diddyt, vazhdon diskutimin

Juria në gjyqin kundër Sean “Diddy” Combs ka njoftuar trupin gjykues se kanë arritur në një vendim unanim sa u përket akuzave 2, 3, 4 dhe 5, por se nuk kanë mundur të arrijnë në një vendim unanim për akuzën e parë.

Akuza e parë është për krim të organizuar. Akuza e dytë ka të bëjë me trafikimin seksual të Cassie Venturas, e treta me prostitucion ndaj Venturës e të tjerave, e katërta trafikim seksual të një viktime tjetër dhe akuza e pestë është transport me qëllim prostitucionin të disa viktimave.

Gjykatësi i është drejtuar jurisë që të vazhdojë diskutimin për të arritur në një vendim unik për akuzën e parë, raportoi CNN.

“Kam marrë letrën tuaj se keni arritur në vendim për akuzat 2 deri në 5, por jo për të parën. Ju kërkoj që të vazhdoni diskutimin”, ka thënë gjykatës Arun Subramanian.

Juria është përgjigjur se diskutimin do ta vazhdojnë të mërkurën.